JEE Main 2023 Result : ఈనెల 29న జేఈఈ మెయిన్‌ ఫలితాలు.. పూర్తి వివరాలివే

JEE Main 2023 Result Date : జేఈఈ మెయిన్‌ ఫలితాలు (JEE Main 2023 Result) ఏప్రిల్‌ 29వ తేదీన విడుదల కానున్నాయి. ఏప్రిల్‌ 6 నుంచి ప్రారంభమైన చివరి విడత మెయిన్‌ పరీక్షలు శనివారం (ఏప్రిల్‌ 15)తో ముగియనున్నాయి. జనవరిలో జరిగిన తొలి విడత మెయిన్, తాజా పరీక్షల్లో సాధించిన ఉత్తమ స్కోర్‌ను (రెండు సార్లు రాసి ఉంటే) పరిగణనలోకి తీసుకొని జాతీయ పరీక్షల మండలి (NTA) ర్యాంకులు కేటాయించనుంది. జేఈఈ మెయిన్‌లో కేటగిరీల వారీగా కటాఫ్‌ మార్కులు నిర్ణయించి మొత్తం 2.50 లక్షల మందికి జేఈఈ అడ్వాన్స్‌డ్‌ రాయడానికి అర్హత కల్పిస్తారు.

జూన్‌ 4వ తేదీన జరిగే JEE Advance 2023 పరీక్ష రాయడానికి ఏప్రిల్‌ 30వ తేదీ నుంచి రిజిస్ట్రేషన్‌ ప్రక్రియ మొదలవుతుందని ఐఐటీ గువాహటి ఇప్పటికే ప్రకటించింది. ప్రతి సంవత్సరం మెయిన్‌ ర్యాంకులు వచ్చిన మరుసటి రోజు నుంచే అడ్వాన్స్‌డ్‌ రాసేందుకు దరఖాస్తుల సమర్పణ ప్రక్రియను ప్రారంభిస్తున్న సంగతి తెలిసిందే. ఈమేరకు ఈసారి ఏప్రిల్‌ 29న జేఈఈ మెయిన్‌ పేపర్‌-1 (బీటెక్‌లో ప్రవేశం కోసం నిర్వహించిన) ర్యాంకులు విడుదలవుతాయని తెలుస్తోంది. జనవరిలో జరిగిన తొలివిడత జేఈఈ మెయిన్‌కు 8.60 లక్షల మంది దరఖాస్తు చేసుకున్నా వారిలో 8.24 లక్షల మంది హాజరయ్యారు. చివరి విడతకు 9.40 లక్షల మంది దరఖాస్తు చేసుకున్నారు. అభ్యర్థులు ఫలితాల కోసం https://jeemain.nta.nic.in/ వెబ్‌సైట్‌ చూడొచ్చు.