త్వరలో 9,355 జూనియర్ పంచాయతీ కార్యదర్శుల భర్తీకి నోటిఫికేషన్

రాష్ట్రంలో 9,355 జూనియర్ పంచాయతీ కార్యదర్శుల భర్తీకి తెలంగాణ ప్రభుత్వం అనుమతి ఇచ్చింది. జూనియర్ పంచాయతీ కార్యదర్శుల భర్తీకి అనుమతి ఇస్తూ ఆర్థిక శాఖ గురువారం (ఆగస్టు 23) ఉత్తర్వులిచ్చింది. శాఖా పరమైన కమిటీతో పోస్టులను భర్తీ చేయాలని ఆర్థిక శాఖ ఉత్తర్వుల్లో పేర్కొన్నారు. ఈ పోస్టుల భర్తీకి సంబంధించి త్వరలోనే నోటిఫికేషన్ వెలువడనుంది.

తెలంగాణలో రాష్ట్రంలో ఆగస్టు 2న 4,383 కొత్త పంచాయతీలు ఆవిర్భవించిన విషయం తెలిసిందే. దీంతో మొత్తం పంచాయతీల సంఖ్య 12,751కు చేరింది. వీటిలో 95 శాతం చిన్న పంచాయతీలే ఉన్నాయి. పల్లె వాసులకు స్థానిక పాలనను మరింత చేరువ చేసేందుకు వీటిని ఏర్పాటు చేశారు. గ్రామ పాలన కోసం ప్రభుత్వం ప్రత్యేక అధికారులను నియమించింది.

అయితే.. కొత్తగా ఏర్పడిన పంచాయతీలను కలుపుకొని రాష్ట్రంలో పంచాయతీ కార్యదర్శుల ఖాళీలు అధికంగా ఉన్నాయి. వీటిని భర్తీ చేయడానికి ప్రభుత్వం సమాయత్తమవుతోంది. రాష్ట్రంలో పాత పంచాయతీలు 8,865 ఉండగా వాటిలోని శివారు గ్రామాలు, తండాలు, గూడేలను వేరుచేసి ప్రభుత్వం 4,383 కొత్త పంచాయతీలను ప్రకటించింది. అలాగే 48 కొత్త మున్సిపాలిటీలను ప్రక‌టించ‌డంతో వీటి సంఖ్య 139కి చేరింది.