సీఏ ఆలిండియా టాపర్‌‌‌గా లక్నో అమ్మాయి

లక్నోకు చెందిన ఇతి అగర్వాల్ చార్టెర్డ్ అకౌంటెంట్స్ ఫైనల్ ఎగ్జామినేషన్‌‌లో ఆలిండియా టాపర్‌గా నిలిచారు. గత ఏడాది నవంబర్లో నిర్వహించిన సీఏ ఫైనల్ పరీక్ష ఫలితాలు మంగళవారం విడుదలయ్యాయి. 800 మార్కులకు గానూ 599 మార్కు సాధించిన ఇతిని ఐసీఏఐ ప్రెసిడెంట్, వైస్ ప్రెసిడెంట్ అభినందించారు. భివాండికి చెందిన పియూష్ రమేష్ లోహియాకు ఆలిండియా సెకండ్ ర్యాంక్ దక్కింది. లోహియా 71.75 శాతం స్కోరు సాధించగా.. మూడోస్థానం సాధించిన జ్యోతి ముకేశ్‌భాయ్ మహేశ్వరికి 70.75% స్కోరు వచ్చింది. ఓవరాల్‌గా 7192 మంది అభ్యర్థులు ఈ పరీక్షలో అర్హత సాధించారు.

ఇతి అగర్వాల్ 2011లో ఐఎస్‌సీ (పన్నెండో తరగతి) పరీక్షల్లో ఆలిండియా ఫస్ట్ ర్యాంక్ సాధించారు. ఆ పరీక్షల్లో ఆమెకు 98.75% స్కోరు రాగా.. మ్యాథ్స్, కామర్స్ సబ్జెక్టుల్లో ఇతి నూరు శాతం మార్కులు సాధించింది. ఢిల్లీలోని ప్రముఖ శ్రీరామ్ కాలేజ్ ఆఫ్ కామర్స్ నుంచి ఆమె బీకాం (ఆనర్స్) చదివారు. 2011 జూన్లో సీఏ ప్రవేశపరీక్షలో డిస్టింక్షన్లో ఉత్తీర్ణత సాధించిన ఇతి సీఏ రెండో దశ అయిన ఐపీసీసీలో ఆలిండియా టాపర్‌గా నిలిచారు. ప్రణాళికా బద్ధంగా చదవడమే తన విజయ రహస్యమని ఇతి టైమ్స్ ఆఫ్ ఇండియాకు ఇచ్చిన ఇంటర్వ్యూలో తెలిపారు. నవంబర్లో సీఏ ఫైనల్ ఎగ్జామ్ రాసిన ఆమె.. డిసెంబర్లో సీఎస్ తుది పరీక్షలు రాయడం విశేషం. ప్రస్తుతం సివిల్స్ లక్ష్యంగా సన్నద్ధం అవుతున్నట్లు ఆమె తెలిపారు. ఇతి తండ్రి బిపిన్ అగర్వాల్ సీఏగా పనిచేస్తున్నారు.