MHA : ఇకపై ఆ పరీక్షలు తెలుగులో కూడా రాయొచ్చు.. లక్షల మంది నిరుద్యోగులకు గుడ్‌న్యూస్‌

Amit Shah CAPF : కేంద్ర ప్రభుత్వం ద్వారా నిర్వహించే CAPF పరీక్షలు ప్రాంతీయ భాషల్లో నిర్వహించాలని కేంద్ర ప్రభుత్వం నిర్ణయించింది. సాయుధ బలగాల్లో పనిచేయాలనుకునే ఉద్యోగార్థులకు ఇది నిజంగానే గుడ్‌న్యూస్‌. ప్రస్తుతం ఉన్న హిందీ, ఇంగ్లిష్‌తోపాటు మరో 13 ప్రాంతీయ భాషల్లోనూ కేంద్ర సాయుధ పోలీసు బలగాల (CAPF) కానిస్టేబుల్ (జనరల్ డ్యూటీ) పరీక్ష నిర్వహణకు కేంద్ర హోంశాఖ ఆమోదం తెలిపింది.

కేంద్ర సాయుధ బలగాల్లో స్థానిక యువత భాగస్వామ్యాన్ని పెంచడంతోపాటు ప్రాంతీయ భాషలను ప్రోత్సహించేందుకుగానూ కేంద్ర హోంశాఖ మంత్రి అమిత్ షా (Amit Shah) చొరవతో ఈ చారిత్రక నిర్ణయం తీసుకున్నట్లు హోంశాఖ ఓ ప్రకటనలో వెల్లడించింది. హోంశాఖ తాజా నిర్ణయంతో అభ్యర్థులు.. ఇప్పటికే ఉన్న హిందీ, ఇంగ్లిష్‌తోపాటు తెలుగు, అస్సామీ, బెంగాలీ, గుజరాతీ, మరాఠీ, మలయాళం, కన్నడ, తమిళం, ఒడియా, ఉర్దూ, పంజాబీ, మణిపురి, కొంకణి భాషల్లో పరీక్ష రాసేందుకు వీలుంటుంది. 2024 జనవరి 1 నుంచి ఇది అమల్లోకి రానుంది. ఈ నిర్ణయంతో లక్షలాది మంది అభ్యర్థులు తమ మాతృభాష, ప్రాంతీయ భాషలో పరీక్ష రాసేందుకు వీలుంటుందని.. తద్వారా వారి ఎంపిక అవకాశాలూ మెరుగుపడతాయని కేంద్ర హోంశాఖ వెల్లడించింది.

TSLPRB SI Mains Key : తెలంగాణ ఎస్‌ఐ మెయిన్స్‌ ప్రైమరీ ఆన్సర్‌ కీ విడుదల.. లింక్‌ ఇదే
తాజా డిమాండ్ల నేపథ్యంలోనే..!
సెంట్రల్‌ రిజర్వ్‌ పోలీస్‌ ఫోర్స్‌ (CRPF) ఉద్యోగ నియామక పరీక్షలను ప్రాంతీయ భాషల్లోనూ నిర్వహించాలని ఇటీవల డిమాండ్లు వినిపించిన విషయం తెలిసిందే. తెలంగాణ మంత్రి కేటీర్‌ (KTR)తో పాటు.. తమిళనాడు ముఖ్యమంత్రి ఎంకే స్టాలిన్‌ (MK Stalin) ఈ విషయమై అమిత్‌ షాకు లేఖ సైతం రాశారు. ఈ క్రమంలోనే తాజా ప్రకటన వెలువడింది. ప్రాంతీయ భాషల వినియోగాన్ని, అభివృద్ధిని ప్రోత్సహించేందుకు కట్టుబడి ఉన్నట్లు కేంద్ర హోం శాఖ తెలిపింది.

కేంద్ర సాయుధ పోలీసు బలగాల కింద సెంట్రల్ రిజర్వ్ పోలీస్ ఫోర్స్, బోర్డర్ సెక్యూరిటీ ఫోర్స్, సెంట్రల్ ఇండస్ట్రియల్ సెక్యూరిటీ ఫోర్స్, ఇండో- టిబెటన్ బార్డర్ పోలీస్, సశస్త్ర సీమబల్, నేషనల్ సెక్యూరిటీ గార్డ్, అస్సాం రైఫిల్స్‌ వస్తాయి. స్టాఫ్ సెలక్షన్ కమిషన్ నిర్వహించే ప్రధాన పరీక్షల్లో సీఏపీఎఫ్‌ కానిస్టేబుల్ (జీడీ) కూడా ఉంటుంది.