విద్యావ్యవస్థను ప్రక్షాళన చేసేలా.. నూతన జాతీయ విద్యావిధానం ముసాయిదా.. కేంద్రం క్లారిటీ

జాతీయ విద్యావిధానంలో సమూల మార్పులను సూచిస్తూ ఇస్రో మాజీ చైర్మన్ కస్తూరి రంగన్ నేతృత్వంలోని కమిటీ నూతన జాతీయ విద్యా విధానం ముసాయిదాను రూపొందించింది. శుక్రవారం కేంద్ర మానవ వనరుల శాఖకు ఈ ముసాయిదాను సమర్పించింది. ఈ ముసాయిదా విషయమై అనేక మంది అభ్యంతరాలు లేవనెత్తుతున్నారు. దీంతో ఈ ముసాయిదా విషయమై విద్యాశాఖ కార్యదర్శి సుబ్రహ్మణం వివరణ ఇచ్చారు. ఈ పాలసీని ప్రభుత్వం ప్రకటించలేదని సాధారణ ప్రజల అభిప్రాయాలను స్వీకరిస్తామని ఆయన తెలిపారు. ప్రజల స్పందన తెలుసుకున్నాక... రాష్ట్ర ప్రభుత్వాలను సంప్రదించిన తర్వాతే ప్రభుత్వం నూతన విద్యా విధానంపై తుది నిర్ణయం తీసుకుంటుందని ఆయన తెలిపారు.

కస్తూరి రంగన్ కమిటీ రూపొందించిన ముసాయిదాకు ఆమోద ముద్ర పడితే.. ప్రస్తుతం అమల్లో ఉన్న 1968 నాటి జాతీయ విద్యా విధానం రద్దవుతుంది. ప్రధాని అధ్యక్షతన నేషనల్ ఎడ్యుకేషన్ కమిటీని ఏర్పాటు చేయాలని కూడా కమిటీ సూచించింది. కాగా, త్రిభాషా సూత్రాన్ని కొనసాగిస్తూ.. హిందీని తమపై బలవంతంగా రుద్దే ప్రయత్నం చేస్తున్నారని తమిళనాడుకు చెందిన డీఎంకే, ఇతర పార్టీలు ఆరోపించాయి. కాగా ప్రభుత్వం ఈ వాదనను తోసిపుచ్చింది. అన్ని భాషలను ప్రోత్సహిత్సామని వివరణ ఇచ్చింది.
ప్రస్తుతం అమల్లో ఉన్న 10+2 విద్యా విధానాన్ని తొలగించాలని కస్తూరి రంగన్ కమిటీ సిఫారసు చేసింది. కొన్ని చోట్ల దీన్ని ఇంటర్మీడియట్‌గా వ్యవహరిస్తుండగా.. మరి కొన్ని చోట్ల హయ్యర్ సెకండరీగా వ్యహరిస్తున్నారు. ప్రస్తుత విద్యా విధానం స్థానంలో 5+3+3+4 విధానాన్ని కమిటీ ప్రతిపాదించింది. ఈ ప్రతిపాదనలు అమల్లోకి వస్తే.. ఇంటర్ అనేది ఉండదు. ప్రి ప్రైమరీ స్టేజ్, ప్రైమరీ స్టేజ్, అప్పర్ ప్రైమరీ, సెకండరీ స్టేజ్ మాత్రమే ఉంటాయి.

సిలబస్‌లోనూ చాలా మార్పులు చోటు చేసుకుంటాయి. విద్యార్థుల అభిరుచులకు అనుగుణంగా సిలబస్ ఉండనుంది. భారతీయ, స్థానిక సంప్రదాయాలను సిలబస్‌లో చేర్చుతారు. కంప్యుటేషనల్ థింకింగ్, డిజిటల్ లిటరసీ, సైంటిఫిక్ టెంపర్, భాషలు, కమ్యూనికేషన్ స్కిల్స్ నేర్పుతారు. వీటితోపాటు నైతిక భావాలు, సాంఘిక, భావోద్వేగపరమైన అంశాలు, తార్కిక పరిశీలనను కూడా చేర్చుతారు.