ఆర్మీ శిక్షణతో జేఈఈలో మెరిసిన కశ్మీరీ యువత

కశ్మీర్‌ విద్యార్థుల కోసం సూపర్-40 పేరుతో ఉచిత ఐఐటీ శిక్షణను ఇండియన్ ఆర్మీ మూడేళ్ల కిందట ప్రారంభించింది. బిహార్ సూపర్ 30కి సమాంతరంగా సూపర్-40 పేరుతో ఇండియన్ ఆర్మీ నిర్వహించే కేంద్రంలో శిక్షణ తీసుకున్న తొమ్మిది మంది విద్యార్థులు ఈ ఏడాది జేఈఈలో ర్యాంకులు సాధించి ఐఐటీలో ప్రవేశానికి అర్హత పొందారు. కశ్మీర్‌ లోయలో విద్యార్థులకు సహాయం అందించడానికి దీనిని ఆర్మీ స్వచ్ఛందంగా ఏర్పాటు చేసింది. ఈ ఏడాది 35 మంది జేఈఈ మెయిన్స్‌కు హాజరైతే 28 మంది అర్హత సాధించారు. తొలిసారిగా లోయ నుంచి ఐదుగురు బాలికలు ఈ శిక్షణకు హజరైతే వీరిలో ఇద్దరు అర్హత సాధించారు. ఈ ఇద్దరూ ఢిల్లీలోని జామియా మిల్లియా యూనివర్సిటీ, జామియా హమ్దార్డ్ యూనివర్సిటీల్లో ఇంజినీరింగ్ కోర్సులో చేరునున్నారు.

శ్రీనగర్‌లో ఆర్మీ నిర్వహిస్తోన్న ఈ ఉచిత శిక్షణ కేంద్రంలో సెంటర్ ఫర్ సోషల్ రెస్పాన్సిబిలిటీ అండ్ లెర్నింగ్, పెట్రోనెట్ ఎల్ఎన్‌జీ భాగస్వామిగా ఉన్నాయి. నైపుణ్యం కలిగిన నిరుపేద కశ్మీరీ యువత విద్యావిషయకంగా విజయం సాధించడంలో సహాయ పడటమే లక్ష్యంగా ఈ ప్రాజెక్ట్‌ను ప్రారంభించారు. అర్హత సాధించిన విద్యార్థులను ఆర్మీ ఛీఫ్ జనరల్ బిపిన్ రావత్ మంగళవారం కలుసుకుని శుభాకాంక్షలు తెలిపారు. మూడేళ్ల కిందట ప్రారంభమైన సూపర్-40 తొలి బ్యాచ్‌లో ఏ ఒక్క విద్యార్థి కూడా జేఈఈలో అర్హత సాధించలేదు. కానీ రెండో ఏడాది 30 మంది జేఈఈ మెయిన్స్‌కు హాజరైతే 25 మంది అర్హత సాధించారు. అలాగే అడ్వాన్స్‌డ్‌లో ఏడుగురు ఉత్తీర్ణత సాధించారని సూపర్-40 ప్రాజెక్ట్ చీఫ్ మేనేజర్ మీనాక్షి షాహీ తెలిపారు. ఈ ఏడాది వీరి సంఖ్య 9 కి చేరుకుందని ఆమె ఆనందం వ్యక్తం చేశారు. వచ్చే ఏడాది ఈ సంఖ్య మరింత పెరుగుతుందని ఆమె ఆశాభావం వ్యక్తం చేశారు.