SSC CGL - 2017 పరీక్ష రద్దు?.. కేంద్ర అభిప్రాయం కోరిన సుప్రీం

ప్రశ్నపత్రాలు లీకీజీకి గురయ్యాయన్న ఆరోపణల నేపథ్యంలో కంబైన్డ్ గ్రాడ్యుయేట్ లెవల్ (సీజీఎల్) - 2017 పరీక్షను రద్దుచేసేందుకే సుప్రీంకోర్టు మొగ్గు చూపుతోంది. పరీక్షలో పేపర్ లీక్ ద్వారా ప్రయోజనం పొందినవారిని గుర్తించడం సాధ్యంకాదని, దానివల్ల వారు ప్రయోజనం పొందకూడదంటే.. పరీక్ష రద్దు చేయడం ఒక్కటే మార్గమని సుప్రీంకోర్టు సోమవారం (అక్టోబరు 29) వ్యాఖ్యానించింది. పరీక్షల నిర్వహణకు మళ్లీ చేపట్టడం మంచిదని సూచించింది. ఈ అంశంపై అభిప్రాయం చెప్పాల్సిందిగా కేంద్రాన్ని కోరింది.

అయితే పరీక్ష రద్దుకు సంబంధించి ఎలాంటి ఉత్తర్వులు జారీ చేయనప్పటికీ.. సీజీఎల్-2017 పరీక్షల విషయంలో మరోసారి పరిశీలించాల్సిన అవసరాన్ని కోర్టు నొక్కిచెప్పింది. ఈ అంశంపై కేంద్ర ప్రభుత్వం నుంచి ప్రతిస్పందన వచ్చిన తర్వాతే తుది నిర్ణయం ఉంటుందని స్పష్టం చేసింది.

సీజీఎల్ పరీక్షలకు సంబంధించి 'టైర్-2' ప్రశ్నపత్రం లీక్ అయిందంటూ ఆరోపణలు రావడంతో.. విద్యార్థులు ఢిల్లీలో పెద్ద ఎత్తున ప్రదర్శనలు నిర్వహించడంతో.. ప్రభుత్వం సీబీఐ దర్యాప్తునకు ఆదేశించింది. సీబీఐ దర్యాప్తు అనంతరం కేసు కోర్టులో విచారణకు రాగా.. సీబీఐ సమర్పించిన నివేదిక చూస్తే పరీక్ష నిర్వహణ అవినీతి మయంగా తయారైనట్లు అర్ధమవుతుందని జస్టిస్ ఎస్ఏ బాబ్డే, ఎల్ నాగేశ్వర రావులతో కూడిన ధర్మాసనం వ్యాఖ్యానిస్తూ.. తదుపరి ఉత్తర్వులు వచ్చేవరకు ఫలితాల విడుదలపై స్టే విధించిన సంగతి తెలిసిందే. సోమవారం మరోసారి విచారణ జరిపిన న్యాయస్థానం ఈ పరీక్ష రద్దుకు మొగ్గు చూపుతూ.. కేంద్ర అభిప్రాయం కోసం సిఫారసు చేసింది.

స్టాఫ్ సెలక్షన్ కమిషన్ సీజీఎల్ పరీక్షలు మొత్తం నాలుగు దశల్లో (4 టైర్) నిర్వహిస్తారు. టైర్-1, టైర్-2లో కంప్యూటర్ ఆధారిత రాతపరీక్షలు; టైర్-3, టైర్-4లో డిస్క్రిప్టివ్ పేపర్, కంప్యూటర్ ప్రొఫీషియన్సీ టెస్ట్ లేదా స్కిల్ టెస్ట్ నిర్వహిస్తారు. టైర్-1 పరీక్షలను గతేడాది ఆగస్టులో నిర్వహించగా.. టైర్-2 పరీక్షలు ఈ ఏడాది ఫిబ్రవరి 22న నిర్వహించారు. కేంద్ర ప్రభుత్వ పరిధిలోని వివిధ విభాగాల్లో గ్రూప్-బి, గ్రూప్-సి క్యాడర్‌లో ఖాళీగా ఉన్న ఆఫీసర్ పోస్టుల భర్తీకి సీజీఎల్ పరీక్షలు నిర్వహిస్తుంటారు.