IIM Directors: పీహెచ్‌డీ లేనివారూ ఐఐఎం డైరెక్టర్ పోస్టులకు అర్హులే!

ప్రతిష్ఠాత్మక మేనేజ్‌మెంట్ విద్యా సంస్థలైన ఐఐఎంలో అత్యంత కీలకమైన డైరెక్టర్ పోస్టుకు ఇక నుంచి సీనియర్ ఎగ్జిక్యూటివ్‌లు పోటీ పడవచ్చు. పీహెచ్‌డీతోపాటు బోధనలో అనుభవం ఉన్నవారు మాత్రమే ఇప్పటి వరకూ డైరెక్టర్ పోస్టులకు అర్హులు. ప్రస్తుతం ఆ నిబంధనల్లో మార్పులు చేస్తూ ఐఐఎం చట్టాన్ని తీసుకొస్తున్నారు. కొత్త నిబంధనల ప్రకారం మేనేజ్‌మెంట్ విభాగంలో పదిహేనేళ్లు అనుభవం ఉన్న వ్యక్తులు దరఖాస్తు చేసుకోవచ్చు. గతంలో కార్పొరేట్ ఎగ్జిక్యూటివ్‌లు ఐఐఎం డైరెక్టర్లుగా వ్యవహరించారు. తొలిసారి ఐఐఎం- అహ్మదాబాద్‌కు ఓ కార్పొరేట్ ఎగ్జిక్యూటివ్ రవి జే మత్తాయ్ 1965లో డైరెక్టర్‌గా బాధ్యతలు చేపట్టారు. తర్వాత కలకత్తా- ఐఐఎం (1990)కు డైరెక్టర్ అయిన సుబీర్ ఛౌదురి కూడా కార్పొరేట్ ఎగ్జిక్యూటివ్. తాజాగా ఐఐఎం చట్టంలో నిబంధనలు మార్పులు తీసుకురావడంతో యువకులు, ప్రతిభావంతులకు అవకాశం దక్కుతుంది.

పదేళ్ల కిందట ఐఐఎం డైరెక్టర్ పోస్టుల భర్తీకి ఎలాంటి స్పష్టమైన నిబంధనలు లేవు. పీహెచ్‌డీతోపాటు టీచింగ్ అనుభవం ఉన్నవారికి ప్రాధాన్యత ఇచ్చేవారు. అయితే ఈ ఏడాది జనవరిలో ఐఐఎం చట్టానికి మార్పులు చేసి, తాజా నిబంధనలు రూపొందించారు. కొత్త నిబంధనల ప్రకారం.. పీహెచ్‌డీ లేదా సమాన విద్యార్హతలు, బోధన లేదా మేనేజ్‌మెంట్‌లో పదిహనేళ్ల అనుభవం లేదా ప్రతిష్ఠాత్మక విద్యా సంస్థల్లో ప్రొఫెసర్‌గా ఏడేళ్లు అనుభవం లేదా పరిశ్రమలలో ఉన్నతస్థాయి హోదాలో పదిహేనేళ్ల అనుభవం ఉండాలి. ఇలాంటి అర్హతలు ఉన్నవారే ఐఐఎం డైరెక్టర్ పోస్టులకు అర్హులని ఉన్నత విద్యాశాఖ కార్యదర్శి ఆర్ సుబ్రమణ్యం పేర్కొన్నారు.