వైద్య ఆరోగ్య శాఖలో 1463 పోస్టుల భర్తీకి గ్రీన్ సిగ్నల్

వైద్య ఆరోగ్య శాఖలో ఖాళీల భర్తీకి తెలంగాణ ప్రభుత్వం అనుమతి ఇచ్చింది. మొత్తం 1463 పోస్టుల భర్తీకి అనుమతి ఇస్తూ శుక్రవారం (ఫిబ్రవరి 2) ఉత్తర్వులు జారీ చేసింది. వీటిలో 1224 సివిల్ అసిస్టెంట్ సర్జన్‌, 14 డెంటల్ అసిస్టెంట్ సర్జన్, 42 సూపర్ స్పెషలిస్ట్, 183 ఆయూష్ మెడికల్ ఆఫీసర్ పోస్టులు ఉన్నాయి. ఈ పోస్టులను త్వరితగతిన భర్తీ చేయాలని భావిస్తున్న ప్రభుత్వం.. ఆ బాధ్యతలను ‘డిపార్ట్‌మెంట్ సెలక్షన్ కమిటీ’కి అప్పగించనున్నట్లు సమాచారం. ఈ పోస్టులను మొదట తెలంగాణ పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ద్వారా భర్తీ చేయాలని నిర్ణయించారు.

మరోవైపు.. పంచాయతీ రాజ్‌ శాఖలోనూ ఖాళీల భర్తీకి తెలంగాణ రాష్ట్ర ప్రభుత్వం గ్రీన్ సిగ్నల్ ఇచ్చింది. మొత్తం 151 ఉద్యోగాలను టీఎస్‌పీఎస్సీ ద్వారా భర్తీ చేయాలని నిర్ణయించింది. వీటిలో 77 జూనియర్‌ అసిస్టెంట్‌, 74 టైపిస్ట్‌ పోస్టులు ఉన్నాయి. హైదరాబాద్‌ మినహా మిగతా జిల్లాల్లో ఈ ఉద్యోగాలను భర్తీ చేయనున్నారు.