తెలంగాణ ఐ-సెట్ 2017 షెడ్యూల్ విడుదల

తెలంగాణ స్టేట్ ఇంటిగ్రేటెడ్ కామన్ ఎంట్రన్ టెస్ట్- 2017 (ఐసెట్)కు షెడ్యూల్ విడుదలైంది. దీనికి సంబంధించిన షెడ్యూల్‌ను తెలంగాణ స్టేట్ ఐసెట్ కన్వీనర్ ఆచార్య ఓం ప్రకాష్ ఈ రోజు విడుదల చేశారు. ఈ నెల 21న అధికారికంగా ఐసెట్‌- 2017 నోటిఫికేషన్‌ విడుదల చేయనున్నామని తెలిపారు. మే 18న పరీక్ష నిర్వహించి, మే 30న ఫలితాలు వెల్లడిస్తామని అన్నారు.

దరఖాస్తుల స్వీకరణ ఈ నెల 21 న ప్రారంభమై ఏప్రిల్ 6తో ముగుస్తుందని ఆచార్య ఓం ప్రకాశ్ పేర్కొన్నారు. ఆ తర్వాత రూ. 500 అపరాధ రుసుంతో ఏప్రిల్ 16 వరకు, రూ.2 వేల రుసుముతో ఏప్రిల్ 25 వరకు, రూ.5 వేల రుసుముతో మే 5 వరకు, రూ.10వేల రుసుముతో మే 14 వరకు దరఖాస్తు చేసుకోవచ్చిన తెలియజేశారు. ఏప్రిల్ 24 నుంచి హాల్ టికెట్లు ఆన్‌లైన్‌లో అందుబాటులో ఉంటాయని వెల్లడించారు.

మే 21న ప్రాథమిక కీ విడుదల చేసి అదే నెల 27 వరకు అభ్యంతరాలను స్వీకరిస్తామని ఐసెట్ కన్వీనర్ తెలిపారు. ఆదిలాబాద్, హైదరాబాద్, జగిత్యాల, కరీంనగర్, ఖమ్మం, కోదాడ, కొత్తగూడెం, మహబూబ్‌నగర్, మంచిర్యాల, నల్లగొండ, నిజామాబాద్, రంగారెడ్డి, సిద్ధిపేట, వికారాబాద్, వనపర్తి, వరంగల్‌లో పరీక్షా కేంద్రాలను ఏర్పాటు చేయనున్నట్లు ఓం ప్రకాష్ వివరించారు.