రెండు భాషల్లోనూ పరీక్ష పేపర్లు: హైకోర్టు

తెలంగాణ ప్రభుత్వం నిర్వహించే టీచర్ రిక్రూట్‌మెంట్ టెస్ట్ (టీఆర్‌టీ)పై హైకోర్టు మధ్యంతర ఉత్తర్వులు జారీ చేసింది. పీఈటీ పేపర్‌ను తెలుగు, ఇంగ్లిష్ భాషల్లో ఇవ్వాలని టీఎస్‌పీఎస్సీని ఆదేశించింది. పరీక్షను రెండు భాషల్లోనూ నిర్వహించాలని కొంతమంది హైకోర్టును ఆశ్రయించారు. వారికి అనకూలంగా తీర్పునిస్తూ.. హైకోర్టు ఈ ఉత్తర్వులు జారీచేసింది.

తెలంగాణ వ్యాప్తంగా ఫిబ్రవరి 24 నుంచి మార్చి 4 వరకు టీఆర్‌టీ పరీక్షలు నిర్వహించనున్నారు. హాల్‌టికెట్ల డౌన్‌లోడింగ్ సమయంలో చాలామంది అభ్యర్థులు ఇబ్బందులు ఎదుర్కొన్నారు. పరీక్షలను టీఎస్‌పీఎస్సీ నిర్వహిస్తున్న సంగతి తెలిసిందే.

మరోవైపు.. టీఆర్‌టీ హాల్‌టికెట్ల జారీని టీఎస్‌పీఎస్సీ నిలిపివేసింది. పరీక్ష కేంద్రాలు దూరంగా పడ్డాయన్న అభ్యర్థుల విజ్ఞప్తి మేరకు హాల్‌టికెట్ల జారీ నిలిపివేసినట్లు అధికారులు తెలిపారు. సవరించిన హాల్‌టికెట్లకు టీఎస్‌పీఎస్సీ వెబ్‌సైట్లో త్వరలోనే అప్‌లోడ్ చేస్తామని పేర్కొన్నారు. ఇదివరకే డౌన్‌లోడ్ చేసుకున్న అభ్యర్థులు మళ్లీ డౌన్ లోడ్ చేసుకుని మారిన పరీక్ష కేంద్రం చూసుకోవాలని వారు సూచించారు.