ఐఏఎఫ్ కోసం ఐటీ ఉద్యోగాన్ని వదులుకుని...

తన కలల కొలువు కోసం భారీ ప్యాకేజీతో ఓ బహుళజాతి సంస్థలో లభించిన ఉద్యోగాన్ని సైతం వదులుకుని పట్టుదలతో శ్రమించి లక్ష్యాన్ని చేరుకుంది. పుణేకు చెందిన 23 ఏళ్ల రుచ సురేంద్ర సయాల్ యుద్ధ విమానంలో ముగ్గురు మహిళ పైలట్లకు చోటు కల్పించిన విషయం తెలిసినప్పుడే వైమానికి దళంలో చేరాలని నిర్ణయించుకుంది. ఈ విషయం విన్న ఏడాది తిరక్కముందే ఎయిర్‌ఫోర్స్ కామన్ అడ్మిషన్ టెస్ట్‌లో అర్హత సాధించి శిక్షణకు ఎంపికయ్యింది. వచ్చే నెలలో ఆమె హైదరాబాద్‌లోని దిండుగల్ శిక్షణ కేంద్రంలో చేరుతుంది. 78 వారాల శిక్షణనంతరం ప్రపంచంలోని అత్యంత పెద్ద వైమానికదళాల్లో ఒకటైన ఇండియన్ ఎయిర్‌ఫోర్స్ టెక్నికల్ విభాగంలో చేరనుంది.

క్యాంపస్ ఇంటర్వ్యూల్లో బెంగళూరుకు చెందిన ఓ బహుళజాతి సంస్థ మంచి ప్యాకేజీతో ఉద్యోగాన్ని ఆఫర్ చేసినా దాన్ని తిరస్కరించి పుణేలో ఉండి ఐఏఎఫ్‌ పరీక్షకు సిద్ధమవ్వాలని నిర్ణయించుకుంది. పుణే‌లోని ఓ సాఫ్ట్‌వేర్ కంపెనీలో ఉద్యోగిగా విధులు నిర్వహిస్తూనే ఉదయం రెండు గంటలు, సాయంత్రం మూడు గంటలు ప్రిపరేషన్‌కు కేటాయించినట్లు రుచ సురేంద్ర తెలిపింది. రుచ తల్లి కేంద్ర ఎక్సైజ్, సర్వీస్ పన్నుల విభాగంలో సూపరింటిండెంట్‌గా విధులు నిర్వహిస్తుంటే, తండ్రి సొంతంగా ఓ వ్యాపారం చేస్తున్నారు. తల్లిదండ్రులు నిర్ణయాన్ని తనకే వదిలేశారని, ఈ విషయంలో వారి మద్దతు కూడా నా విజయానికి తోడ్పడిందని ఆమె పేర్కొన్నారు. పదో తరగతి, ఇంటర్‌లోనూ 85 శాతం స్కోర్ సాధించిన రుచ కంప్యూటర్ ఇంజినీరింగ్‌లో డిగ్రీ పూర్తిచేసింది. చివరి సెమిస్టర్‌లోనే ఐఏఎఫ్‌లో చేరాలని నిర్ణయించుకున్నట్లు తెలిపింది.