TS CPGET Results: తెలంగాణ CPGET ఫలితాలు విడుదల.. రిజల్ట్‌ చెక్‌ చేసుకోవడానికి లింక్‌ ఇదే

TS CPGET 2022 Result: తెలంగాణ కామన్‌ పోస్ట్‌ గ్రాడ్యుయేట్‌ ఎంట్రన్స్‌ టెస్ట్‌ (CPGET)-2022 ఫలితాలు కొద్దిసేపటి క్రితం విడుదలయ్యాయి. హైదరాబాద్‌లోని తెలంగాణ స్టేట్‌ కౌన్సిల్‌ ఆఫ్‌ హైయర్‌ ఎడ్యుకేషన్‌ (ఉన్నత విద్యా మండలి) ఛైర్మన్‌ ఆర్‌ లింబాద్రి, ఓయూ వీసీ డి రవీందర్‌ చేతుల మీదుగా మంగళవారం ఫలితాలను విడుదల చేశారు. ఫలితాల్లో 94.14 శాతం ఉత్తీర్ణతతో అమ్మాయిలు సత్తాచాటారు. 38,712 మంది అమ్మాయిలు పరీక్షకు హాజరుకాగా, 36,437 మంది అర్హత సాధించారు. 18,550 అబ్బాయిలు పరీక్షకు హాజరుకాగా, 17,613 మంది క్వాలిఫై అయ్యారు. మొత్తం 57,262 మంది పరీక్షలకు హాజరుకాగా, వారిలో 54,050 మంది (94శాతం) అర్హత సాధించారు. నిరుడుతో పోలిస్తే ఉత్తీర్ణత రెండు శాతం పెరిగింది.

ఫలితాలను అధికారిక వెబ్‌సైట్‌ https://cpget.tsche.ac.in/ లో విద్యార్ధులు ఫలితాలు చెక్‌ చేసుకోవచ్చు. కాగా ఈ యేడాది ఆగస్టు 11 నుంచి 23 వరకు ఆన్‌లైన్‌ విధానంలో జరిగిన సీపీగెట్‌ 2022 పరీక్షలకు దాదాపు 57,262 మంది విద్యార్ధులు హాజరయ్యారు. మొత్తం 45 సబ్జెక్టుల్లో పీజీ, 4 యేళ్ల ఇంటిగ్రేటెడ్‌, పీజీ డిప్లొమా కలిపి 50 కోర్సుల్లో ప్రవేశాల కోసం ఈ పరీక్షలను నిర్వహించారు.

ఈ ప్రవేశ పరీక్షలో సాధించిన ర్యాంకు ఆధారంగా రాష్ట్రవ్యాప్తంగా ఉన్న ఉస్మానియా, కాకతీయ, తెలంగాణ, పాలమూరు, మహాత్మా గాంధీ, శాతవాహన, తెలంగాణ మహిళా విశ్వవిద్యాలయం, జవహర్‌లాల్ నెహ్రూ సాంకేతిక విశ్వవిద్యాలయం- హైదరాబాద్.. వంటి ఎనిమిది యూనివర్సిటీల్లో ప్రవేశాలు కల్పిస్తారు. ఈ సారి ఫలితాల్లో అర్హత సాధించిన మహిళలకు మహిళా యూనివర్సిటీలో కూడా అడ్మిషన్స్ పొందే అవకాశం ఉంది.