Vijayasai Reddy: ఏపీ ప్రజలకు నిబద్ధత లేదు - విజయసాయి రెడ్డి ఆడియో లీక్?

‘‘ఆంధ్రా జనం తెలంగాణవారిలా నిబద్ధత కలిగినవారు కాదు. ఏపీలో భయనకమైన కుల సంఘర్షణ ఉంది. ఈ ఎన్నికల్లో గెలుస్తామంటూ కొందరు జగన్‌ను తప్పుదోవ పట్టిస్తున్నారు. మోదీ పచ్చి స్వార్థపరుడు. మోదీ స్వార్థం మాత్రమే చూసుకుంటారు’’ అనే కామెంట్స్‌తో లీకైన ఓ ఆడియో టేప్ ఏపీలో హల్‌చల్ సృష్టిస్తోంది. ఈ ఆడియో ‘ఏబీఎన్ ఆంధ్రజ్యోతి’ ఛానెల్‌కు లభించింది.

ఇందులో ఉన్న వాయిస్ వైసీపీ ఎంపీ విజయసాయి రెడ్డిదేనని ఆ ఛానెల్ పేర్కొంది. ఆడియోలోని వ్యాఖ్యల ప్రకారం.. ‘‘గెలిచేందుకు అవకాశం ఉంటే గెలిచినట్లు కాదు. అవకాశాన్ని గెలుపుగా మార్చుకోవాలి. పోలింగ్ ముగిసేవరకు బాధ్యతగా ఉండాలి. బాధ్యతగల నాయకులే ఫోన్లలో మీరేం కంగారు పడకండి. మనం గెలుస్తున్నాం. అనవసరంగా కంగారు పడుతున్నారని అంటున్నారు. వీరే జగన్‌ను తప్పుదోవ పట్టిస్తున్నారు. మనం గెలుస్తున్నాం అని చెబితే అదే భ్రమలో ఉంటారు. చంద్రబాబు ఏమైనా చేస్తాడు. పవన్ కళ్యాణ్ ఇంటికి వెళ్లి కాళ్లు కూడా పట్టుకుంటాడు. గోదావరి జిల్లాలో మనకు నష్టం జరుగుతుంది. ఆంధ్రా జనం తెలంగాణవారిలా నిబద్ధత కలిగినవారు కాదు. ఏపీలో భయనకమైన కుల సంఘర్షణ ఉంది’’.

‘‘ఈ ఎన్నికల్లో గెలుపుపై ఓవర్ కాన్ఫిడెన్స్ వద్దు. ఎక్కడో గ్రౌండ్‌లో ఉన్న నెగటివిటీని ఓటుగా మార్చే యంత్రాంగంగా మార్చండి. భారత దేశంలోనే అత్యంత నీచమైన నాయకుడితో జగన్ మోహన్ రెడ్డి పోరాడుతున్నారు. మోదీని సాయం చేయమనండి. కానీ.. న్యాయంగా చేయమనండి. డబ్బులు పంచకుండా ఎలక్షన్ కమీషన్‌ను చర్యలు తీసుకోమనండి. జగన్ కేసుల్లో ఆధారాలు దొరక్కపోయినా ఇంకా కోర్టుల్లో తిప్పుతున్నారు? మన బలం నిరూపించుకున్న తర్వాత మోదీ ఏం చేస్తారు? మన బల నిరూపణకు నిజాయతీగా సహయ సహకారాలు అందించాలి. ఇప్పుడు కేసీఆర్‌కు మోదీ సాయం చేశారు. న్యాయబద్ధంగా నిజాయతీగా ఎలక్షన్ కమిషన్‌ను వాడమని చెబుతున్నాం. మోదీ ఏమీ చెయ్యడు. మోదీ పచ్చి స్వార్థపరుడు. మోదీ స్వార్థం మాత్రమే చూసుకుంటారు’’ అనే వ్యాఖ్యలు ఆడియోలో ఉన్నాయి. అయితే, ఆ ఆడియో విజయసాయి రెడ్డిదా.. కాదా అనేది తెలియాల్సి ఉంది.