సుకుమార్ ఇంటికి క్యూ కడుతున్న అభ్యర్థులు

ఆంధ్రప్రదేశ్‌లో ఎన్నికల సమయం సమీపిస్తున్న కొద్దీ ప్రచారం ఊపందుకుంటోంది. వివిధ రాజకీయ పార్టీల అభ్యర్థులు ఎండను సైతం లెక్కచేయక గ్రామగ్రామాన ప్రచారం చేస్తూ సందడి చేస్తున్నారు. తమ పార్టీకే ఓటేయాలని అందరినీ కోరుతూ ముందుకు సాగుతున్నారు. నియోజకవర్గంలో అందరినీ కలుపుకొనిపోతూ గెలుపు కోసం చెమటోడుస్తున్నారు. ఈ క్రమంలో తమ నియోజకవర్గంలో ఉన్న ప్రముఖులను కూడా కలుస్తూ ప్రచారానికి వాడేసుకుంటున్నారు.

‘రంగస్థలం’ సినిమాతో ఇండస్ట్రీ హిట్ కొట్టిన సుకుమార్‌కు కూడా రాజకీయ వేడి తగులుతోంది. ఆయన స్వస్థలమైన తూర్పుగోదావరి జిల్లా మలికిపురం మండలం మట్టపర్రు గ్రామం రాజోలు నియోజవర్గం పరిధిలోకి వస్తుంది. సుకుమార్ ప్రస్తుతం తన స్వగ్రామంలోనే ఉన్నారు. ఈ విషయం తెలుసుకున్న ప్రధాన పార్టీ అభ్యర్థులు ఆయన ఇంటికి వెళ్లి మద్దతివ్వాలని కోరుతుకున్నారు. రాజోలు నుంచి టీడీపీ అభ్యర్థిగా పోటీ చేస్తున్న గొల్లపల్లి సూర్యారావు, జనసేన అభ్యర్థి రాపాక వరప్రసాదరావు ఆదివారం సుకుమార్ ఇంటికి వేర్వేరుగా వెళ్లి ఆయన్ని కలిశారు. తమ పార్టీకి మద్దతిచ్చి ఓటేసి గెలిపించాలని కోరారు. ప్రధాన పార్టీల అభ్యర్థుల రాకతో సుకుమార్ నివాసం సందడిగా మారింది.