Bhimavaram: భీమవరంలో పవన్ కళ్యాణ్ ఓటమి.. గ్రంథికి మంత్రి పదవి ఖాయం!

జనసేన అధినేత పవన్ కళ్యాణ్ గాజువాకతోపాటు భీమవరం నుంచి ఎన్నికల బరిలో నిలిచారు. తన సొంత జిల్లా అయిన పశ్చిమ గోదావరి జిల్లాలో జనసేనకు ఊపు తేవడం కోసం ఆయన.. భీమవరం నుంచి పోటీ చేశారు. భీమవరంలో గెలిచిన పార్టీ రాష్ట్రంలో అధికారంలోకి వస్తుందనే సెంటిమెంట్ కూడా పవన్ ఇక్కడి నుంచి పోటీకి దిగడానికి కారణమైందని వార్తలొచ్చాయి. పవన్ కళ్యాణ్ పోటీ చేయడంతో ఏపీ రాజకీయాల్లో భీమవరం హాట్ టాపిక్ అయ్యింది. కానీ అనూహ్యంగా ఆయన భీమవరంలో ఓటమిపాలయ్యారు.

3900 ఓట్ల తేడాతో వైఎస్ఆర్సీపీ అభ్యర్థి గ్రంథి శ్రీనివాస్ పవన్ కళ్యాణ్‌ను ఓడించారు. ఫ్యాన్ ప్రభంజనం కారణంగా గ్రంథి శ్రీనివాస్ జనసేనాని ఓడించారు. ఆరంభం నుంచి వెనుకంజలో ఉన్న పవన్.. మధ్యలో పుంజుకున్నప్పటికీ.. ఓడిపోక తప్పలేదు. భీమవరంలో టీడీపీ నుంచి సిట్టింగ్ ఎమ్మెల్యే పులవర్తి రామాంజనేయులు, వైఎస్ఆర్సీపీ నుంచి గ్రంథి శ్రీనివాస్ పోటీ చేసిన సంగతి తెలిసిందే. పులవర్తి పట్ల ప్రజల్లో వ్యతిరేకత ఉండటంతో.. ఇక్కడ వైఎస్ఆర్సీపీ, జనసేనాని మధ్యే గట్టి పోటీ జరిగింది. భీమవరంలో ఎన్నికల ప్రచారం నిర్వహించిన జగన్.. లోకల్ హీరోకు, యాక్టర్ మధ్య పోరంటూ.. గ్రంథిని హీరో చేసేశారు. భీమవరంలో వైఎస్ఆర్సీపీ జెండా ఎగిరితే శీనన్నకు మంత్రి పదవి ఇస్తానన్నారు.

గ్రంథి గత ఎన్నికల్లో ఓడిపోవడం, 2009లో పోటీ చేసే అవకాశం రాకపోవడంతో.. సానుభూతి ఆయనకు కలిసొచ్చింది. ఓడినప్పటికీ గత ఐదేళ్లుగా ఆయన ప్రజలకు అందుబాటులో ఉంటున్నారు. జగన్ ఇచ్చిన మాట ప్రకారం.. గ్రంథిని మంత్రి పదవి వరించే అవకాశాలున్నాయి.