Gajuwaka: గాజువాకలో ‘పవర్’ఫుల్ విక్టరీ? ఇలా జరిగితే గ్లాసే బాసు!

ఎగ్జిట్ పోల్స్ జనసేన అధినేత, పవర్ స్టార్ పవన్ కళ్యాణ్ అభిమానులను తీవ్ర నిరాశకు గురిచేసిన సంగతి తెలిసిందే. గుడ్డిలో కంటే మెల్ల బెటర్ అన్నట్లుగా కనీసం ఆ పార్టీ అధినేత పవన్ గెలిచినా గొప్పేనని రాజకీయ విశ్లేషకులు అంచనా వేశారు. ఈ నేపథ్యంలో అందరి దృష్టి పవన్ బరిలో నిలిచిన గాజువాక, భీమవరం నియోజవర్గాలపై పడింది.

అయితే ఇక్కడ టీడీపీ, వైసీపీ శ్రేణులు బలంగా ఉండటంతో పవన్ గెలుపు అవకాశాలపై అనుమానాలు ఉన్నాయి. పవన్ విజయానికి అక్కడ కలిసి వచ్చే అంశం ఏదైనా ఉందంటే అది కేవలం ఆయన పాపులారిటీ మాత్రమే. దీనికి ఆయన సామాజికవర్గం ఓట్లు తోడైతే తప్పకుండా విజయం వరిస్తుంది. అయితే, అక్కడ పోలింగ్ సరళిని పరిశీలిస్తే జనసేన విజయం అంత సులభం కాదని, టీడీపీ-వైసీపీల నుంచి గట్టి పోటీయే ఎదురైందని తెలుస్తోంది.

గాజువాక మాజీ శాసనసభ్యుడు, జనసేన నేత చింతలపూడి వెంకట్రామయ్యకు ఈ నియోజకవర్గంలో మంచి పట్టు వుంది. కానీ పవన్‌ కల్యాణ్‌ కోసం చింతలపూడిని పెందుర్తికి మార్చారు. దీంతో ప్రత్యర్థి పార్టీలు పవన్ స్థానికుడు కాదని, ఇక్కడి సమస్యలపై అవగాహన ఉన్న తమకే ఓటేయాలని ప్రచారం చేశారు.

గత ఎన్నికల్లో వైసీసీ అభ్యర్థి తిప్పల నాగిరెడ్డిపై టీడీపీ అభ్యర్థి పల్లా శ్రీనివాసరావు 21,572 ఓట్ల మెజార్టీతో విజయం సాధించారు. అప్పట్లో పల్లాకు మద్దతిచ్చిన పవన్ కళ్యాణ్ స్వయంగా అతనిపై పోటీలో దిగడం గమనార్హం. ప్రస్తుతం జనసేన, వైసీపీలు ప్రభుత్వ వ్యతిరేక ఓట్లపైనే ఆధారపడి ఉన్నాయి. అయితే, గాజువాకలో పల్లా సామాజిక వర్గం బలమైనది కావడం, వైసీపీ ఓట్లు జనసేనకు పడితే విజయం తనదేనని పల్లా ధీమాతో ఉన్నారు.

ఆ ఒక్కటే ఆశ..: పవన్ గాజువాకను ఎంపిక చేసుకోడానికి బలమై కారణమే ఉంది. రాష్ట్రంలో జనసేనకు బలమున్న కేంద్రం గాజువాక అని సర్వేలో తేలిన తర్వాతే ఆయన అక్కడ నుంచి పోటీకి సిద్ధమయ్యారు. అప్పట్లో చిరంజీవి స్థాపించిన ‘ప్రజారాజ్యం’ నుంచి కొత్త అభ్యర్థిగా బరిలో దిగిన చింతలపూడి వెంకట్రామయ్య సుమారు 17వేల ఓట్లు మెజార్టీతో గెలుపొందారు. ఆ హవా కొనసాగితే గాజువాకలో జనసేన విజయం నల్లేరుపై నడకే.