లగడపాటీ నీవెక్కడ? ఆంధ్ర ఆక్టోపస్‌ సర్వేపై పేలుతున్న జోకులు

ఆంధ్ర ఆక్టోపస్ లగడపాటి రాజగోపాల్ అంచనాలు మళ్లీ తారుమారయ్యాయి. గతేడాది తెలంగాణ ఎన్నికలపై జరిపిన సర్వే కంటే దారుణంగా ఏపీలో ఆయన అంచనాలు విఫలమయ్యాయి. గురువారం విడుదలైన ఎన్నికల ఫలితాల్లో వైసీపీ దూసుకెళ్తున్న నేపథ్యంలో నెటిజనులు లగడపాటిని టార్గెట్ చేశారు. లగడపాటి నీవెక్కడంటూ ట్రోల్ చేస్తున్నారు.

2019 ఏపీ ఎన్నికల్లో టీడీపీకి 100 స్థానాలకు పది సీట్లు అటు ఇటుగా వస్తాయని లగడపాటి సర్వే అంచనా వేసిన సంగతి తెలిసిందే. ప్రతిపక్ష వైసీపీకి ఏడు స్థానాలు అటు ఇటుగా 72 సీట్లు వస్తాయని తెలిపారు. అయితే, తాజా ఫలితాలు ఇందుకు పూర్తి విరుద్ధంగా ఉన్నాయి. మొత్తం 175 అసెంబ్లీ స్థానాల్లో వైసీపీ 149 స్థానాల్లో గెలుపొందగా.. ఒక స్థానంలో ఆధిక్యంలో ఉంది. టీడీపీ 21 స్థానాల్లో గెలుపొందగా 3 స్థానాల్లో ఆధిక్యంలో ఉంది. జనసేన ఒక స్థానంలో గెలిచింది. మొత్తం 25 లోక్‌సభ స్థానాల్లో వైసీపీ 21 స్థానాల్లో, టీడీపీ 1 స్థానంలో గెలుపొందింది. ప్రస్తుతం 2 స్థానాల్లో టీడీపీ, 1 స్థానంలో వైసీపీ ఆధిక్యంలో ఉంది. దీంతో నెటిజన్‌లంతా లగడపాటిని వెంటాడుతున్నారు. జోకులు, మీమ్స్‌తో పిచ్చెక్కిస్తున్నారు. రాజకీయాలకు సన్యాసం తీసుకున్నట్లే సర్వేలు చేయడం తప్పుకోవాలంటూ సెటైర్లు పేలుస్తున్నారు.