Jharkhand Election Results: సీఎంను ఓడించిన ఇండిపెండెంట్.. ఎవరీ సరయూ రాయ్?

జార్ఖండ్ ఎన్నికల ఫలితాల్లో బీజేపీకి ఎదురుదెబ్బ తగిలింది. ఆ రాష్ట్ర సీఎం రఘుబర్ దాస్.. స్వతంత్ర అభ్యర్థి చేతిలో ఓటమిపాలయ్యారు. జేఎంఎం-కాంగ్రెస్ కూటమి ఆధిక్యంలో సాగుతుండగా.. స్వతంత్ర అభ్యర్థి చేతిలో సీఎం సైతం ఓడిపోవడం.. ప్రభుత్వ వ్యతిరేకతకు అద్దం పడుతోంది. జంషెడ్‌పూర్ ఈస్ట్ స్థానం నుంచి ఇండిపెండెంట్‌గా పోటీ చేసిన సరయూ రాయ్.. 8550 ఓట్ల తేడాతో రఘుబర్ దాస్‌ను ఓడించారు.

2014లో రాయ్ జంషెడ్‌పూర్ వెస్ట్ నుంచి పోటీ చేసి గెలుపొందారు. కానీ ఈ అసెంబ్లీ ఎన్నికల్లో పార్టీ ఆయనకు టికెట్ నిరాకరించడంతో.. రఘుబర్ దాస్ కాబినెట్‌ నుంచి వైదొగిలిన రాయ్.. బీజేపీకి రాజీనామా చేశారు. జంషెడ్‌పూర్ ఈస్ట్ నుంచి ఇండిపెండెంట్‌గా పోటీ చేశారు.

2014 ఎన్నికల్లో సరయూ రాయ్.. 10 వేల ఓట్ల తేడాతో బన్నా గుప్తాపై గెలుపొందారు. 2005లో ఆయన తొలిసారి ఎమ్మెల్యేగా విజయం సాధించారు. 2009 ఎన్నికల్లో 3 వేల ఓట్ల తేడాతో కాంగ్రెస్ అభ్యర్థి బన్నా గుప్తా చేతిలో ఓడారు. విభజనకు ముందు బిహార్‌లో ఎమ్మెల్సీగా ఆయన పని చేశారు.

బిహార్‌లో దాణా కుంభకోణాన్ని రాయ్ బయటపెట్టారు. ఈ కుంభకోణంలోనే బిహార్ మాజీ సీఎం లాలు ప్రసాద్ యాదవ్ సహా పలువురు సీనియర్ రాజకీయ నాయకులు జైలుపాలయ్యారు. మధు కోడా హయాంలో రూ.8 వేల కోట్ల ఐరన్ ఓర్ గనుల కేటాయింపు కుంభకోణాన్ని కూడా ఆయన బయటపెట్టారు. 1951 జులై 16న జన్మించిన సరయూ రాయ్.. 1970-72లో పట్నా యూనివర్సిటీ నుంచి మాస్టర్స్ పూర్తి చేశారు.