నాలుగో దశలో 56.58శాతం పోలింగ్

జార్ఖండ్‌ అసెంబ్లీ ఎన్నికల్లో భాగంగా సోమవారం (డిసెంబర్ 16న) నాలుగవ విడత అసెంబ్లీ ఎన్నికలు ప్రశాంతంగా ముగిశాయి. ఈ దశ పోలింగ్‌లో 56.58 శాతం ఓటింగ్‌ నమోదైందని ఎన్నికల అధికారులు తెలిపారు. 81 అసెంబ్లీ స్థానాలున్న జార్ఖండ్ అసెంబ్లీకి తొలి మూడు దశల్లో 50 స్థానాలకు ఎన్నికలు జరగగా, నాలుగో దశలో 15 స్థానాలకు ఎన్నిక జరిగింది. చివరిదైన ఐదో దశ పోలింగ్ డిసెంబర్ 20న 16 స్థానాలకు జరగనుంది. ఈ నెల 23న ఫలితాలు వెలువడనున్నాయి.

సమస్యాత్మక జమునా, గిరిధ్, తుండి, బగోడర్, దుమ్రి నియోజకవర్గాల్లో భద్రతా కారణాల వల్ల మధ్యాహ్నం 3 గంటలకు పోలింగ్ పూర్తయింది. మిగతా స్థానాల్లో సాయంత్రం 5 గంటల వరకు పోలింగ్ కేంద్రాలకు చేరుకున్న వారికి ఓటేసేందుకు అధికారులు అవకాశం కల్పించారు. మధ్యాహ్నం వరకు నమోదైన పోలింగ్ చూసి భారీగా పోలింగ్ నమోదుకావచ్చునని అధికారులు భావించారు. కానీ నాలుగో దశలో ఓ మోస్తరు పోలింగ్ నమోదైంది.