Shettar‌ vs Santhosh: కర్ణాటకలో చల్లారని టికెట్ల లొల్లి.. తెరపైకి బీఎల్ సంతోష్ పేరు!

Shettar‌ vs Santhosh: బీజేపీని వీడి కాంగ్రెస్‌లో చేరిన మాజీ ముఖ్యమంత్రి జగదీష్ శెట్టర్.. బీజేపీ జాతీయ ఆర్గనైజింగ్ జనరల్ సెక్రటరీ బీఎల్ సంతోష్‌పై ఆగ్రహం వ్యక్తం చేశారు. తనకు టిక్కెట్ నిరాకరించడంలో.. బి.ఎల్. సంతోష్ కీలక పాత్ర పోషించారని సంచలన ఆరోపణలు చేశారు. హుబ్లీ-ధార్వాడ్ సెంట్రల్ నియోజకవర్గం నుంచి తాను ఆరుసార్లు ఎమ్మెల్యేగా ఎన్నికయ్యానని.. అలాంటి తనకు కాకుండా.. బీఎల్ సంతోష్ (BL Santosh) వేరే వారికి టికెట్ ఇప్పించారని ఫైర్ అయ్యారు. హుబ్లీ-ధార్వాడ్ సెంట్రల్ నియోజకవర్గం నుంచి షెట్టర్‌కు కాంగ్రెస్ అవకాశం ఇచ్చింది. అదే స్థానానికి బీజేపీ.. రాష్ట్ర ఆర్గనైజింగ్ జనరల్ సెక్రటరీ మహేష్ తెంగింకైని ఎంపిక చేసింది. దీనిపై Jagadish Shettar ఆగ్రహం వ్యక్తం చేశారు. 'అత్యధిక ఓట్లతో గెలిచే అవకాశం ఉన్నప్పుడు నాకు టికెట్ ఎందుకు నిరాకరించారు. దీని వెనుక నేపథ్యాన్ని పరిశీలిస్తే.. బీఎల్ సంతోష్ మూల కారణం అని నేను నమ్ముతున్నాను. నాకు టిక్కెట్టు ఇచ్చి.. తర్వాత ఉపసంహరించుకున్నారు. అతను నన్ను పావుగా చేసి గేమ్ ఆడారు' అని శెట్టర్ ఆరోపించారు.

బీజేపీ పార్టీ కోసం సంస్థాగతంగా పనిచేసిన తెంగింకైకి బీజేపీ టికెట్‌ ఇచ్చింది. అయితే.. అతనికి అవకాశం ఇవ్వడాన్ని శెట్టర్ తప్పుబట్టలేదు. కానీ.. పార్టీ తనను గౌరవించాలనుకుంటే ఎమ్మెల్సీని చేసి ఉండొచ్చు.. లేదా ఏదైనా ముఖ్యమైన పదవి ఇచ్చి ఉండేదని శెట్టర్ ఆవేదన వ్యక్తం చేశారు. కర్ణాటకలో బీఎల్ సంతోష్‌కు చాలా మంది సన్నిహితులు ఉన్నారని.. ఈ మహేష్ తెంగింకై కూడా తన శిష్యులలో ఒకరు అని చెప్పారు. తెంగింకై ఆరేడు నెలలుగా తనపై దుష్ప్రచారం చేస్తున్నారని శెట్టర్ ఆరోపించారు.

జగదీష్ శెట్టర్.. ఆర్‌ఎస్‌ఎస్‌లో కీలకమైన వ్యక్తి. కొన్ని దశాబ్దాలుగా జన్ సంఘ్, బీజేపీలో ఆయన క్రియాశీలకంగా వ్యవహారించారు. అయితే.. అసెంబ్లీ ఎన్నికలు సమీపిస్తున్న తరుణంలో.. తనను పట్టించుకోకపోవడం, టికెట్ నిరాకరించడంతో ఆయన బీజేపీతో తెగతెంపులు చేసుకున్నారు. ఈమధ్యే కాంగ్రెస్‌లో చేరారు. ఆయన పార్టీని వీడకుండా ముఖ్యమంత్రి బసవరాజ బొమ్మై, కేంద్ర మంత్రులు ధర్మేంద్ర ప్రధాన్, ప్రహ్లాద్ జోషిలు తీవ్ర ప్రయత్నాలు చేశారు. కానీ.. ఎన్నికల్లో పోటీ చేయాలనే పట్టుదలతో ఆయన వెనక్కి తగ్గలేదు.