MTB Nagaraj: మంత్రి చదివింది 9వ తరగతి.. ఆస్తులేమో రూ.1,609 కోట్లు.. !

కర్ణాటక శాసనసభ ఎన్నికల్లో బీజేపీ, కాంగ్రెస్ పార్టీలు దాదాపు తమ అభ్యర్థులను ఖరారు చేశాయి. మొత్తం 224 స్థానాలకు గానూ బీజేపీ 222, కాంగ్రెస్ 210 సీట్లకు అభ్యర్థులను ప్రకటించాయి. ఈ నేపథ్యంలో హోసకోటే స్థానం నుంచి మంత్రి ఎంటీబీ నాగరాజు సోమవారం నామినేషన్ దాఖలు చేశారు. ప్రస్తుతం ఇది సోషల్ మీడియాలో వైరల్ అవుతోంది. అందుకు కారణం ఆయన తమ పేరున రూ.1,609 కోట్ల ఆస్తులున్నట్టు ప్రకటించడమే. భార్య శాంతకుమారి పేరిట రూ.536 కోట్ల చరాస్తులు, రూ.1,073 కోట్ల స్థిరాస్తులు ఉండగా.. ఇద్దరికీ రూ.98.36 కోట్లు అప్పులు ఉన్నట్టు వెల్లడించారు.వ్యాపారవేత్త అయిన ఎంటీబీ నాగరాజు.. 2018 కర్ణాటక ఎన్నికల్లో కాంగ్రెస్‌ తరఫున పోటీచేసి విజయం సాధించారు. ఆయన అప్పట్లో తమకు రూ.1,120 కోట్ల ఆస్తులు ప్రకటించారు. 14 నెలల తర్వాత జేడీఎస్‌- కాంగ్రెస్‌ సంకీర్ణ ప్రభుత్వం కూలిపోయి బీజేపీ అధికారం చేపట్టే క్రమంలో మూకుమ్మడిగా రాజీనామా చేసిన 17 మంది ఎమ్మెల్యేలలో ఈయన కూడా ఉన్నారు. బీజేపీలో చేరిన తర్వాత 2020 ఉప ఎన్నికల్లో పోటీచేసినప్పుడు రూ.1,220 కోట్ల ఆస్తులున్నట్లు అఫిడ్‌విట్‌లో పేర్కొన్నారు. అయితే, ఆ ఎన్నికల్లో స్వతంత్ర అభ్యర్థి శరత్ బాచేగౌడ చేతిలో నాగరాజు ఓడిపోయారు. అనంతరం.. ఆయనకు ఎమ్మెల్సీగా అవకాశం ఇచ్చి, మంత్రివర్గంలోకి తీసుకున్నారు.

మొత్తంగా ఐదేళ్లలో ఎంటీబీ నాగరాజు ఆస్తుల విలువ రూ.500 కోట్లు, మూడేళ్లలో రూ.390 కోట్ల మేర పెరిగినట్టయ్యింది. తొమ్మిదో తరగతి వరకే చదువుకున్న ఎం.టి.బి.నాగరాజుకు స్థిరాస్తి వ్యాపారం, వ్యవసాయం ప్రధాన వృత్తిగా ఉన్నాయి. ఈ ఎన్నికల్లోనూ శరత్ బాచేగౌడతోనే నాగరాజు పోటీ పడుతున్నారు. 2020 ఉప-ఎన్నికల్లో గెలిచిన తర్వాత శరత్.. కాంగ్రెస్ పార్టీలో చేరారు. ఈసారి ఆయనకు కాంగ్రెస్ టిక్కెట్ కేటాయించింది. ఇక, నాగరాజ్ తర్వాతి కర్ణాటక కాంగ్రెస్ అధ్యక్షుడు డీకే శివకుమార్ రూ.1,358 కోట్లతో రెండో స్థానంలో ఉన్నారు. 2018తో పోల్చితే ఆయన ఆస్తులు 62 శాతం మేర పెరిగినట్టు పేర్కొన్నారు. అప్పట్లో తన ఆస్తులు రూ.840 కోట్లుగా ప్రకటించారు.


Read More Latest National News And Telugu News