Kerala: ఎదురులేని నాయకుడు.. బీజేపీ ఆశలు గల్లంతే, టైమ్స్ నౌ సర్వే

ఈసారి కేరళలో బీజేపీ అధికారంలోకి వస్తుందా? వరుస విజయాలతో ఊపు మీదున్న కమలదళం దక్షిణాదిలోనూ పట్టు సాధిస్తుందా? ఫిబ్రవరి 28న ఐదు రాష్ట్రాలకు ఎన్నికల షెడ్యూల్ విడుదలైన నాటి నుంచి దేశంలో ఎక్కువ మంది ఇదే విషయంపై చర్చిస్తున్నారు. కేరళలో ఈసారి బీజేపీ పాగా వేస్తుందని ఎక్కువ మంది భావిస్తున్నారు. కానీ, అలా జరగదట. సీఎం పీఠం సంగతి పక్కనబెడితే.. బీజేపీకి కనీసం రెండు స్థానాలను గెలుచుకునేది కూడా డౌటేనట. టౌమ్స్ నౌ సీ ఓటర్ సర్వేలో అనూహ్యమైన ఫలితాలు వెల్లడయ్యాయి.

పినరయి విజయన్ నేతృత్వంలోని ఎల్‌డీఎఫ్ (Left Democratic Front) కూటమి 82 సీట్లతో తిరిగి అధికారాన్ని నిలబెట్టుకుంటుందని టైమ్స్ నౌ సర్వేలో వెల్లడైంది. 140 స్థానాలున్న కేరళ అసెంబ్లీలో LDF స్పష్టమైన మెజార్టీ సాధిస్తుందని తేలింది. ఇక ప్రతిపక్ష యూడీఎఫ్ (United Democratic Front) 56 నుంచి 60 సీట్లకు పరిమితమవుతుందని సర్వే పేర్కొంది.

ఈసారి కేరళలో పాగా వేయాలని పట్టుదటగా ఉన్న బీజేపీకి 0 నుంచి 2 సీట్లు రావొచ్చునని అభిప్రాయం వ్యక్తమైంది. ఇది ఎవరూ ఊహించని పరిణామం. 2016 ఎన్నికలతో పోలిస్తే ఎల్‌డీఎఫ్ ఓటింగ్ శాతం స్వల్పంగా పెరిగే అవకాశం ఉందని సర్వేలో వెల్లడైంది. ఇక దేశ ప్రధానిగా రాహుల్ గాంధీ ఉండాలని 55.84 శాతం మంది మలయాళీలు కోరుకుంటుండటం మరో ప్రత్యేకత.

సీఎం పినరయి విజయన్ పనితీరు పట్ల 42.34 శాతం మంది సంతృప్తి వ్యక్తం చేశారు. ముఖ్యమంత్రిగా తిరిగి ఆయనే పదవి బాధ్యతలు చేపట్టాలని అభిప్రాయం వ్యక్తం చేశారు. కరోనా సంక్షోభ సమయంలో విజయన్ ఉత్తమ పనితీరు కనబర్చారని కేరళతో పాటు దేశంలో ఎక్కువ మంది ప్రజల అభిప్రాయం. నిజాయతీగా పనిచేస్తారనే పేరుంది.