మహిళ బట్టలు ఉతుకుతుండగా.. ఎన్నికల ‘సిత్రం’

ఎన్నికల ప్రచారమంటేనే చిత్రవిచిత్రాలకు నెలవు. ఐదు రాష్ట్రాల్లో ఎన్నికల వేళ కొంత మంది అభ్యర్థులు ఓటర్లను వైవిధ్యంగా ఆకట్టుకునే ప్రయత్నం చేస్తున్నారు. ఈ క్రమంలో ఆసక్తికర ఘటనలు చోటు చేసుకుంటున్నాయి. తమిళనాడులోని నాగపట్టణంలో అన్నాడీఎంకే తరఫున పోటీ చేస్తున్న తంగ కత్తిరవన్‌ ఇలాగే ప్రచారం నిర్వహిస్తుండగా.. ఓ ఇంట్లో మహిళ దుస్తులు ఉతుకుతూ కనిపించింది. దీంతో కత్తివరన్ ఆమెను పక్కకు తప్పుకోమని ఆ దుస్తులను తనే ఉతికేశారు.

తంగ కత్తిరవన్‌ బట్టలు ఉతుకుతున్న దృశ్యాలు సోషల్ మీడియాలో వైరల్ అవుతున్నాయి. కొంత మంది నెటిజన్లు ఆయనపై విమర్శల వర్షం కురిపిస్తున్నారు. ఓటర్లను ప్రసన్నం చేసుకోవడానికి పడరాని పాట్లు పడుతున్నారని సెటైర్ వేశారు.

మరోసారి అధికారంలోకి వస్తే పేద కుటుంబాలకు ఉచితంగా వాషింగ్‌ మెషిన్లను ఇస్తామని ఏఐడీఎంకే తన ఎన్నికల ప్రణాళికలో హామీ ఇచ్చింది. ఆ హామీ కచ్చితంగా నెరవేరుస్తామనే ఉద్దేశంతోనే తమ నేత ఇలా బట్టలు ఉతికినట్లు కత్తివరన్ అనుచరులు పేర్కొన్నారు. తమ నేత చర్యను ఇలా సమర్థించారు..