Chandrayangutta Election Results: చాంద్రాయణగుట్ట అక్బరుద్దీన్ కంచుకోట.. ఢీకొనేవారేలేరు!

ఆల్ ఇండియా మజ్లిస్-ఇ-ఇత్తేహదుల్ ముస్లిమీన్ (ఏఐఎంఐఎం) సీనియర్ నేత అక్బరుద్దీన్ ఒవైసీ చాంద్రాయణగుట్ట నియోజకవర్గం నుంచి వరసగా ఐదోసారి గెలుపొందారు. కాంగ్రెస్ అభ్యర్థి ఇషా బిన్ ఒబైద్ మిస్రీ‌పై అక్బరుద్దీన్ విజయం సాధించారు. ఏఐఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ సోదరుడైన అక్బరుద్దీన్‌కు చాంద్రయాణగుట్ట కంచుకోట. 1999 నుంచి ఇక్కడ అక్బరుద్దీన్‌దే విజయం. ప్రత్యర్థులెవరైనా విజయం మాత్రం అక్బురుద్దీన్‌దే కావడం విశేషం.

చాంద్రయాణగుట్టలో అక్బరుద్దీన్‌ను ఢీకొట్టడానికి జిమ్ ట్రైనర్ అయిన బాడీబిల్డర్ మిస్రీని కాంగ్రెస్ పోటీలోకి దించింది. అలాగే ఏబీవీపీకి చెందిన ముస్లిం మహిళ సయ్యద్ షెహ్‌జాదిని బీజేపీ రంగంలోకి దించింది. టీఆర్ఎస్ ఎలాగూ మజ్లిస్‌కు మిత్రపక్షం కాబట్టి అభ్యర్థిని నిలపలేదు. టీఆర్ఎస్ మద్దతుతో వరుసగా ఐదోసారి అక్బరుద్దీన్ శాసనసభకు ఎన్నికయ్యారు. 43,969 ఓట్ల భారీ మెజారిటీతో అక్బరుద్దీన్ గెలిచారు.

అయితే, 2014తో పోలిస్తే ఈ మెజారిటీ తక్కువనే చెప్పాలి. గత అసెంబ్లీ ఎన్నికల్లో మజ్లిస్ బచావో తెహ్రీక్ పార్టీ అభ్యర్థి డాక్టర్ ఖయ్యమ్ ఖాన్‌పై అక్బురుద్దీన్ 59,274 ఓట్ల తేడాతో విజయం సాధించారు. అప్పటి ఆధిక్యంతో పోలిస్తే ప్రస్తుతం మెజారిటీ కాస్త తక్కువే. అయినప్పటికీ చాంద్రాయణగుట్టలో తనకు తిరుగులేదని అక్బురుద్దీన్ మరోసారి నిరూపించారు. వాస్తవానికి 1978 నుంచే చాంద్రాయణగుట్టలో ఏఐఎంఐఎం పాగా వేసింది. ఆ పార్టీ తరఫున అమానుల్లా ఖాన్ వరసగా నాలుగుసార్లు చాంద్రాయణగుట్ట నుంచి అసెంబ్లీకి ఎన్నికయ్యారు.

అయితే 1994లో ఎంఐఎం నుంచి బయటికి వచ్చిన ఖాన్.. మజ్లిస్ బచావో తెహ్రీక్(ఎంబీటీ) పార్టీని స్థాపించారు. ఎంబీటీ తరఫున ఎమ్మెల్యేగా గెలిచారు. అయితే 1999లో అక్బరుద్దీన్ చేతిలో అమానుల్లా ఖాన్ ఓడిపోయారు. అప్పటి నుంచి చాంద్రాయణగుట్టలో మరో పార్టీ జెండాను అక్బురుద్దీన్ ఎగరనివ్వలేదు. కాగా, ప్రస్తుత అసెంబ్లీ ఎన్నికల్లో మజ్లిస్ ఏడు స్థానాల్లో గెలుపొందింది. ఓల్డ్ సిటీలోని మలక్‌పేట, కార్వాన్, చార్మినార్, చాంద్రాయణగుట్ట, యాకుత్‌పుర, నాంపల్లి, బహదూర్‌పుర నియోజకవర్గాల్లో ఎంఐఎం విజయం సాధించింది.