హైదరాబాద్: గుత్తా జ్వాల ఓటు గల్లంతు

బ్యాడ్మింటన్ క్రీడాకారిణి గుత్తా జ్వాల పేరు ఓటర్ల జాబితాలో గల్లంతయ్యింది. శుక్రవారం ఉదయం ఓటు హక్కు వినియోగించుకోవడానికి హైదరాబాద్‌లోని బంజారాహిల్స్ పోలింగ్ కేంద్రానికి వెళ్లారు. తీరా అక్కడికి వెళ్లాక జాబితాలో పేరు లేకపోవడంతో షాకయ్యారు. దీంతో నిరాశతో వెనుదిరిగి వెళ్లిపోయారు. గత ఎన్నికల్లో తాను ఇక్కడే ఓటు వేశానని.. ఇప్పుడు తన ఓటు లేదని.. పేరును ఎందుకు తొలగించారో తెలియదన్నారు.

తన ఓటు గల్లంతవ్వడంపై గుత్తా జ్వాలా ట్విట్టర్‌లో ఆగ్రహం వ్యక్తం చేశారు. ‘ఆన్‌లైన్‌లో చెక్‌ చేసినప్పుడు నా పేరు ఓటర్ల జాబితాలో లేకపోవడం ఆశ్చర్యమేసింది. ఓటర్ల జాబితాలో ఓటర్ల పేర్లు లేనప్పుడు ఎన్నికలు పారదర్శకంగా ఎలా జరుగుతున్నట్లని’ప్రశ్నించారు. #whereismyvote అంటూ హ్యాష్ టాగ్ పెట్టారు.

అంతేకాదు చాలామంది నెటిజన్లు కూడా తమ ఓట్లు గల్లంతయ్యాయని గుత్తా జ్వాలతో చెప్పారు. ఆమె ట్వీట్లను రీ ట్వీట్ చేశారు.