Nandamuri Suhasini: వ్యతిరేకమే కానీ.. సుహాసినీ పోటీపై పురంధేశ్వరి స్పందన

తెలంగాణ ఎన్నికల్లో భాగంగా ఎన్టీఆర్ కుమార్తె, బీజేపీ నేత దగ్గుబాటి పురంధేశ్వరి ఆ పార్టీ ప్రచారంలో బిజీగా ఉన్నారు. మల్కాజగిరిలో రోడ్ షో నిర్వహించిన ఆమె టీఆర్ఎస్ ప్రభుత్వం, మహాకూటమిలపై మండిపడ్డారు. అవినీతిలో కూరుకుపోయిన టీఆర్ఎస్‌ను చిత్తుగా ఓడించాలని, సిద్దాంతాలు లేని మహాకూటమిని మట్టికరిపించాలని పిలుపునిచ్చారు.

ప్రచారం తర్వాత ఆమె కాసేపు విలేకరులతో మాట్లాడారు. ఈ సందర్భంగా పురంధేశ్వరి సోదరుడు, టీడీపీ నేత దివంగత హరికృష్ణ కుమార్తె నందమూరి సుహాసిని కూకట్‌పల్లి నియోజకవర్గం నుంచి మహాకూటమి తరఫున పోటీ చేస్తున్న విషయం ప్రస్తావనకు వచ్చింది. ఆమెకు మీ మద్దతు ఉంటుందా అనే ప్రశ్నకు పురందేశ్వరి స్పందిస్తూ.. ‘‘ఆమె నాకు మేనకోడలు అవుతుంది. ఓ మేనత్తగా కోడలికి ఎప్పుడూ నా ఆశీర్వాదం ఉంటుంది. పార్టీలు, సిద్ధాంతాలపరంగా మేము వ్యతిరేకమైనా, మా కుటుంబ సభ్యురాలిగా ఆమెకు నా దీవెనలు ఉంటాయి’’ అని అన్నారు.