ఆ టీఆర్ఎస్ నేత నామినేషన్ చెల్లదు: జీవన్‌రెడ్డి

సాధారణంగా ఎన్నికలు అనగానే కోడ్‌ ఆఫ్‌ కండక్ట్‌ గుర్తుకొస్తుంది. ఎన్నికలు పూర్తయ్యేవరకు ఎలా నడుచుకోవాలి, ఏ విషయాల జోలికి ఎన్నికల నేపథ్యంలో వెళ్లకూడదన్న వాటిపై నేతలు దృష్టిసారిస్తారు. వాటితో పాటు చివరగా నామినేషన్ల విషయంలో చాలా జాగ్రత్తగా వ్యవహరిస్తారు. సోమవారం (నవంబర్‌ 19న) నామినేషన్ల దాఖలు తుది గడువు ముగియగా, నవంబర్‌ 20న వాటి పరిశీలన ప్రక్రియ చేశారు.

కానీ టీఆర్‌ఎస్‌ అభ్యర్థి సంజయ్‌ కుమార్‌ నామినేషన్‌ పత్రాల్లో గందరగోళం నెలకొంది. జగిత్యాల నుంచి టీఆర్‌ఆర్‌ తరఫున బరిలోకి దిగుతున్న సంజయ్‌ కుమార్‌ నాలుగు సెట్ల నామినేషన్‌ పత్రాలు సమర్పించారు. కానీ ఏ ఒక్క సెట్‌ పత్రాల్లోనూ కాలమ్‌-5 నింపలేదు. మంగళవారం నామినేషన్‌ పత్రాల పరిశీలన సమయంలో ఇది గమనించిన కాంగ్రెస్‌ అభ్యర్థి జీవన్‌ రెడ్డి అభ్యంతరం వ్యక్తం చేశారు.

ఎన్నికల నిబంధనల ప్రకారం ఒక్క కాలమ్‌ నింపకపోయినా నామినేషన్‌ను తిరస్కరించాలన్నారు. కానీ రిటర్నింగ్‌ అధికారి టీఆర్‌ఎస్‌ అభ్యర్థి సంజయ్‌ నామినేషన్‌ను తిరస్కరింలేదని, దీనిపై సీఈవో రజత్‌కుమార్‌కు ఫిర్యాదు చేయనున్నట్టు తెలిపారు.