Telengana Congress: పొన్నాల అభ్యర్థిత్వం ఖరారు.. నేడు కాంగ్రెస్ తుది జాబితా

జనగామ టికెట్‌పై ఉత్కంఠకు తెరపడింది. జనగామ నియోజకవర్గం నుంచి కాంగ్రెస్‌ సీనియర్‌ నేత, మాజీ మంత్రి పొన్నాల లక్ష్మయ్య మహాకూటమి అభ్యర్థిగా బరిలోకి దిగనున్నారు. ఈ మేరకు పార్టీ రాష్ట్ర వ్యవహారాల ఇన్‌ఛార్జి ఆర్‌సీ కుంతియా స్పష్టం శుక్రవారం (నవంబరు 16) రాత్రి చేశారు. పొన్నాలకే జనగాం టికెట్‌ ఖరారు చేసినట్లు ఆయన స్పష్టం చేశారు. కోదండరాంతో సుదీర్ఘ మంతనాల అనంతరం కుంతియా ఈ ప్రకటన చేశారు.

జనగామ స్థానాన్ని కాంగ్రెస్‌కు ఇచ్చేందుకు టీజేఎస్‌ నేత కోదండరామ్‌ అంగీకరించారని కుంతియా చెప్పారు. శుక్రవారం అర్ధరాత్రి కుంతియా, పీసీసీ అధ్యక్షుడు ఉత్తమ్ కుమార్ రెడ్డి, పొన్నాల లక్ష్మయ్య.. నాంపల్లిలోని తెలంగాణ జనసమితి కార్యాలయంలో భేటీ అయ్యారు. దాదాపు 3 గంటల పాటు కోదండారామ్‌తో చర్చించిన అనంతరం మీడియాతో కుంతియా మాట్లాడారు.

మహాకూటమిలో సీట్ల సర్దుబాటులో భాగంగా 14 స్థానాల్లో టీడీపీ, 8 స్థానాల్లో జనసమితి, 3 స్థానాల్లో సీపీఐ పోటీ చేస్తుందని ఆయన వెల్లడించారు. మహాకూటమి 'కామన్‌ మినిమమ్‌ ప్రోగ్రాం కన్వీనర్‌'గా కోదండరాం ఉంటారని ఆయన పేర్కొన్నారు. కూటమి తరఫున కోదండరాం రాష్ట్రమంతా తిరిగి ప్రచారం చేస్తారని తెలిపారు.

Related Article:
కోదండరామ్‌తో ఉత్తమ్, పొన్నాల భేటీ.. జనగాంపై స్పష్టత