తెలంగాణ ఎన్నికల షెడ్యూల్‌పై హైకోర్టులో డీకే అరుణ పిటిషన్

తెలంగాణ ఎన్నికలపై పిటిషన్ల పర్వం కొనసాగుతోంది. ఓటర్ల జాబితాపై ఇప్పటికే హైకోర్టులో విచారణ జరుగుతుండగానే.. తాజాగా ఎన్నికల సంఘం విడుదల చేసిన షెడ్యూల్‌పై మరో పిటిషన్ దాఖలయ్యింది. ఎన్నికల సంఘం విడుదల చేసిన షెడ్యూల్‌ను సవాల్ చేస్తూ.. తెలంగాణ కాంగ్రెస్ నేత డీకే అరుణ హైకోర్టులో లంచ్ మోషన్ పిటిషన్ వేశారు. అరుణ తరఫున లయార్ నిరూప్ రెడ్డి హైకోర్టును ఆశ్రయించారు.

ఈ పిటిషన్‌లో కేబినెట్ నిర్ణయంతోనే అసెంబ్లీని రద్దు చేస్తారా అని ప్రశ్నించారు. సభకు కనీసం సమాచారం ఇవ్వకుండా 9 నెలలు ముందుగానే అసెంబ్లీని రద్దు చేశారని ప్రస్తావించారు. ఇది శాసనసభ్యుల హక్కుల్ని కాల రాయడమేనని పేర్కొన్నారు. లంచ్ మోషన్ పిటిషన్ కావడంతో సోమవారమే విచారణకు వచ్చే అవకాశం ఉంది. మరి ఈ పిటిషన్‌పై హైకోర్టు ఎలా స్పందిస్తుంద అన్నది ఆసక్తిగా మారింది.