Telangana Elections 2018: కూటమికి సీపీఐ మరో అల్టిమేటం

మహాకూటమికి సీపీఐ మరోసారి అల్టిమేటం జారీ చేసింది. తమ పార్టీ నేతలతో చర్చలు జరపకుండా సీపీఐకి సీట్లు ప్రకటించటం సరికాదన్నారు సీపీఐ నేత చాడ వెంకట్‌రెడ్డి. తాము కోరినట్లు ఐదు సీట్లకు ఒప్పుకోకుంటే నేటి సాయంత్రం భవిష్యత్ కార్యాచరణ ప్రకటిస్తామని చాడ వెంకట్‌రెడ్డి స్పష్టం చేశారు. అయితే కాంగ్రెస్ మరోసారి పునరాలోచించాలని, కూటమిలో అన్ని పార్టీలకు న్యాయం జరగాలన్నారు. ఈ నేపథ్యంలోనే సీపీఐ కార్యవర్గ సమావేశాన్ని (నవంబర్ 9) సాయంత్రానికి వాయిదా వేశామని తెలిపారు.

తమకు సీట్లు కేటాయింపులపై మహాకూటమికి చెందిన టీజేఎస్ పార్టీ అధినేత ప్రొఫెసర్ కోదండరాం, తెలంగాణ టీడీపీ అధ్యక్షుడు ఎల్‌.రమణ, కాంగ్రెస్ నుంచి కె. జానారెడ్డిలను మరోసారి కలిసి చర్చిస్తామన్నారు. కూటమిలో కొనసాగాలంటే సీపీఐకి 5 స్థానాలు ఇచ్చి తీరాల్సిందేనని చాడ మరోసారి చెప్పారు. తమకు బలం ఉన్న స్థానాల సీట్లకు బదులు సీపీఐకి బలంలేని సీట్లు కేటాయిస్తే తీసుకునే ప్రసక్తే లేదన్నారు.

తొలుత 95 సీట్లలో బరిలోకి దిగుతామన్న కాంగ్రెస్.. కూటమి మిత్రులతో చర్చల అనంతరం తాము 93 సీట్లలో పోటీ చేస్తామని పేర్కొంది. తమకు బలమున్న వైరా, హుస్నాబాద్‌, కొత్తగూడెం, మంచిర్యాల, బెల్లంపల్లి సీట్లను సీపీఐ కోరుతోంది. టీడీపీకి 14 సీట్లు, టీజేఎస్‌కు 8, సీపీఐకి 3, ఇంటి పార్టీకి ఒక్క సీటును కాంగ్రెస్ అధిష్టానం కేటాయించినా అధికారికంగా ప్రకటన మాత్రం చేయడం లేదు.

మరికొన్ని గంటల్లో ఏ క్షణమైనా కూటమి సీట్ల కేటాయింపులపై అధికారిక ప్రకటన రానున్న నేపథ్యంలో సీపీఐ నేతలు మిగతా రెండు సీట్లు కూడా ఇచ్చి తీరాల్సిందేనని పట్టుపడుతున్నారు. కాంగ్రెస్ మరో 2 సీట్లు కేటాయించని పక్షంలో సీపీఐ కూటమి నుంచి బయటకొచ్చే సొంతంగా పోటీ చేసే అవకాశాలున్నాయి. సాయంత్రంకల్లా కాంగ్రెస్ తీసుకునే నిర్ణయంపై సీపీఐ భవిష్యత్ కార్యాచరణ ఉండబోతుందని అంచనా వేస్తున్నారు.