Chandrababu Naidu: ‘కింగ్ మేకర్’ కోరికతో.. తెలంగాణలో కాంగ్రెస్ ఓటమికి బాబే కారణమా?

తెలంగాణ ఎన్నికల్లో టీఆర్ఎస్ పార్టీ తిరుగులేని విజయం సాధించింది. గత ఎన్నికల్లో బొటాబొటీ మెజార్టీ సాధించిన గులాబీ దళం.. ఈ దఫా ఎన్నికల్లో భారీ విజయాన్ని అందుకున్నారు. తెలంగాణ ఎన్నికలు ముగిశాక టీఆర్ఎస్ విజయం గురించి ఎంతగా మాట్లాడుకుంటున్నారో.. కాంగ్రెస్ ఓటమిలో చంద్రబాబు పాత్ర ఉందనే చర్చ అంతకు మించి జరుగుతోంది. తెలంగాణలో ఓటమికి నిజంగా చంద్రబాబే కారణమా? కింగ్ మేకర్ కావాలనే తాపత్రయంలోనే ఆయన ఇలా చేశారా? చూద్దాం..

తెలంగాణలో చక్రం తిప్పాలనే యోచన బాబుకు ఉందా? లేదా? అనేది పక్కనబెడితే.. అక్కడ కూడా పార్టీని కాపాడుకోవాలనే తాప్రయతం మాత్రం ఆయనలో ఉందనిపిస్తుంది. అందుకే ముందుగా టీఆర్ఎస్‌తో పొత్తు కోసం ఆయన ప్రయత్నించారు. తెలుగుదేశం ముఖ్య నేతలకు సీట్లు ఇస్తే చాలని కోరారు. కానీ తెలంగాణలో టీడీపీ ఉండాల్సిన అవసరం లేదని భావించిన కేసీఆర్ అందుకు అంగీకరించలేదు.

కేసీఆర్ నో అన్నాకే బాబు చూపు కాంగ్రెస్ వైపు మళ్లింది. మహాకూటమి ఆలోచన మొగ్గ తొడిగింది. అదే సమయంలో కేంద్రంతో పొసగకపోవడం కూడా ఇందుకు కారణమైంది. జాతీయ రాజకీయాల్లో మోదీకి వ్యతిరేకంగా పక్షాలను కూడగడుతున్న చంద్రబాబు.. ఆ క్రమంలోనే శత్రువు శత్రువు మిత్రుడన్న రీతిలో కాంగ్రెస్‌తో చేతులు కలిపారు. ఏ పార్టీకి వ్యతిరేకంగా టీడీపీ పుట్టిందో ఆ పార్టీతోనే మైత్రికి సిద్ధపడ్డారు.

తమ పార్టీ అభ్యర్థుల తరఫున ప్రచారం చేయడంతోపాటు మహాకూటమి తరఫున కూడా బాబు ప్రచారానికి దిగారు. కూకట్ పల్లిలో నందమూరి హరికృష్ణ కుమార్తెను సైతం పోటికి దింపారు. టీడీపీ, కాంగ్రెస్ ఒక్కటయ్యాక వాస్తవానికి మహాకూటమికి హైప్ వచ్చింది. అదే సమయంలో చంద్రబాబును కేసీఆర్ బూచిగా చూపడంలో సఫలీకృతం అయ్యారు. కూటమి గెలిస్తే.. చంద్రబాబు కింగ్ మేకర్ అయ్యేవారనేది తిరుగులేని వాస్తవం. కానీ తెలంగాణలో ఓటమితో బాబుకు ఆ ఆస్కారం లేకుండా పోయింది. పైగా చంద్రబాబు వల్లే కేసీఆర్ గెలుపు తేలికైందనే విమర్శలు వెలువడ్డాయి. కాంగ్రెస్ పరాజయాన్ని బాబు ఖాతాలో వేస్తూ సోషల్ మీడియాలో పోస్టులు పెడుతున్నారు. ఏపీలోనూ బాబుకు వ్యతిరేక స్వరాలు ఏకమవుతున్నాయి.

గతంలో ఎన్డీయే హయాంలో చక్రం తిప్పారనే చరిత్రను పక్కనబెడితే.. చంద్రబాబు కింగ్ మేకర్‌ ఎప్పుడూ కాదు. కానీ ఆయన మంచి కోఆర్డినేటర్. తనకున్న పరిచయాలను ఉపయోగించుకొని పార్టీలను ఏకతాటికిపైకి తీసుకు రావడానికి మాత్రం ఆయనకు సాధ్యమైంది. తెలంగాణలో ఓడటంతో కింగ్ మేకర్ అయ్యే ఛాన్స్ పోగొట్టుకున్న చంద్రబాబుకు కేసీఆర్ థర్డ్ ఫ్రంట్ రూపంలో మరో ముప్పు పొంచి ఉంది. తెలంగాణ ఎన్నికల ఫలితం మరోలా ఉంటే బాబుకు జాతీయంగా ప్రాధాన్యం పెరిగేది. కానీ ఇప్పుడు మాత్రం కాంగ్రెస్ ఓటమికి కారణమయ్యారనే అపప్రదను మూటగట్టుకున్నారు. అంతే కాదు ఇంటా బయటా ఒత్తిడిని పెంచేసుకున్నారు.