రాహుల్ నివాసం వద్ద బండ కార్తీక రెడ్డి అరెస్టు

కూటమిలో సీట్ల రచ్చ తారాస్థాయికి చేరింది. కాంగ్రెస్‌లో అసంతృప్తి జ్వాలలు ఏకంగా ఢిల్లీ వరకు చేరాయి. సికింద్రాబాద్‌ స్థానాన్ని తనకు కేటాయించలేదని అసంతృప్తి వ్యక్తం చేస్తున్న హైదరాబాద్ మాజీ మేయర్ బండ కార్తీక రెడ్డి ఢిల్లీలో ఏఐసీసీ అధ్యక్షుడు రాహుల్‌ గాంధీ నివాసం ఎదుట బైఠాయించారు. గురువారం (నవంబర్ 15) మధ్యాహ్నం నుంచి ధర్నా చేస్తున్న ఆమెను ఢిల్లీ పోలీసులు అరెస్టు చేశారు.

రాహుల్‌ నివాసం వద్ద నిరసన చేపట్టిన కార్తీక రెడ్డిని బుజ్జగించడానికి పార్టీ అధిష్టానం తుది వరకూ ప్రయత్నం చేసింది. కానీ, ఆమె పట్టువీడకుండా అక్కడే బైఠాయించారు. దీంతో అక్కడే ఉన్న పోలీసులు కార్తీక రెడ్డితో పాటు ఆమె భర్తను కూడా అదుపులోకి తీసుకున్నారు. వారిని బలవంతంగా పోలీసు వాహనంలో ఎక్కించుకొని తుగ్లక్‌ రోడ్డులోని పోలీస్‌ స్టేషన్‌కు తరలించారు.