కేసీఆర్ సెంటిమెంట్: బీ- ఫారాలకు అక్కడ పూజలు చేస్తే గెలుపు ఖాయం!

జ్యోతిషం, వాస్తు, దేవుళ్లు, సెంటిమెంట్లను బలంగా నమ్మే తెలంగాణ ఆపద్ధర్మ సీఎం కేసీఆర్ వీటిని తప్పకుండా పాటిస్తారు. ఇక కొయినపల్లి ఆలయంలోని వెంకన్న పాదాల చెంత బీ-ఫారాలు ఉంచితే తప్పకుండా విజయం సాధిస్తారని కేసీఆర్ బలంగా నమ్ముతారు. గతంలో ఆయన పోటీచేసిన ప్రతి సందర్భంలోనూ ఇలాగే జరిగింది. ప్రస్తుతం కూడా అదే సంప్రదాయాన్ని టీఆర్ఎస్ అధినేత అనుసరిస్తున్నారు. తాజాగా ఇప్పటి వరకు ప్రకటించిన 107 మంది టీఆర్ఎస్ అభ్యర్థుల బీ-ఫారాలను కొయిపల్లి వెంకన్న ఆలయంలో ఉంచి, ఆదివారం పూజలు నిర్వహించారు. ఇక్కడ పూజలు చేసి పత్రాలతో నామినేషన్ దాఖలు చేస్తే విజయం నల్లేరు మీద నడకేనని కేసీఆర్ భావిస్తారు. ఆయన తొలిసారిగా 1983 ఎన్నికల్లో సిద్ధిపేట అసెంబ్లీ స్థానం నుంచి ఉమ్మడి రాష్ట్రంలో టీడీపీ తరఫున పోటీచేసినప్పుడు బీ-ఫారాలకు కొనిపల్లి వేంకటేశ్వర స్వామి ఆలయంలోనే పూజలు నిర్వహించి, నామినేషన్ దాఖలు చేశారు. హైదరాబాద్ నగరానికి 100 కిలోమీటర్ల దూరంలోని ఈ ఆలయాన్ని నామినేషన్ దాఖలుచేసేటప్పుడు ప్రతిసారీ సందర్శించి, కేసీఆర్ ప్రత్యేక పూజలు చేస్తారు.

ఆ ఎన్నికల్లో కేసీఆర్ విజయం సాధించారు. తర్వాత పోటీచేసిన ప్రతి ఎన్నికల్లోనూ కేసీఆర్ ఈ సంప్రదాయాన్ని కొనసాగిస్తున్నారు. గతంలో మహబూబ్‌నగర్, కరీంనగర్, మెదక్ పార్లమెంటు స్థానాలకు పోటీచేసిన సమయంలోనూ ఇలాగే చేశారు. ఇక, 2014 ఎన్నికల్లోనూ గజ్వేల్‌లో నామినేషన్ వేసినప్పుడు కూడా కొనిపల్లి ఆలయంలో బీ-ఫారాలకు పూజలు చేశారు. అక్కడ నుంచి భారీ విజయం సాధించడంతో ఆయన నమ్మకం మరింత బలపడింది. తెలంగాణ ఏర్పడిన తర్వాత చండీయాగం నిర్వహించి, తిరుపతి, విజయవాడల్లోని ఆలయాలకు భారీ కానుకలు సమర్పించారు.