కాంగ్రెస్‌కు అధ్యక్షుడు కావాలనుకున్నా, కానీ!: కేసీఆర్ ఆసక్తికర వ్యాఖ్యలు

గతంలో తాను తెలంగాణ కాంగ్రెస్ అధ్యక్షుడిగా బాధ్యతలు చేపట్టాలనుకున్నానని ఆపద్ధర్మ ముఖ్యమంత్రి కేసీఆర్ వెల్లడించారు. కొత్త రాష్ట్రం ఏర్పాడ్డక కేసీఆర్ టీఆర్ఎస్ పార్టీని కాంగ్రెస్‌లో విలీనం చేయకుండా మాట తప్పారనడంలో నిజం లేదన్నారు. కేసీఆర్ మాటలు విన్న జర్నలిస్ట్‌లతో పాటు టీఆర్ఎస్ నేతలు షాకయ్యారు. మీడియాతో చిట్‌చాట్‌లో భాగంగా కేసీఆర్ ఈ ఆసక్తికర వ్యాఖ్యలు చేశారు. పోరాడి సాధించుకున్న తెలంగాణ రాష్ట్రం ఏర్పడ్డాక తాను యూపీఏ చైర్‌పర్సన్ సోనియా గాంధీని కలిశానని నాలుగున్నరేళ్ల కిందటి విషయాలను గుర్తు చేశారు.

టీఆర్ఎస్ పార్టీని కాంగ్రెస్ లో విలీనం చేయాలని సోనియా కోరినట్లు వెల్లడించారు. అయితే టీఆర్ఎస్‌ను విలీనం చేసినా కాంగ్రెస్‌కు ప్రయోజనం ఉండదని సోనియాకు చెప్పానన్నారు. మా పార్టీని విలీనం చేస్తానని, అయితే తెలంగాణ కాంగ్రెస్ అధ్యక్షుడిగా తనను నియమించాలని కోరగా, సోనియా అందుకు అభ్యంతరం చెప్పినట్లు కేసీఆర్ ఆసక్తికర విషయాలు షేర్ చేసుకున్నారు.

తెలంగాణ వచ్చాక టీఆర్ఎస్ ఉనికే ఉండదని అవమానించారని తెలిపారు. కానీ టీఆర్ఎస్‌లో ఉన్న విజయశాంతితో పాటు పలువురు నేతలను కాంగ్రెస్‌లో చేర్చుకున్నారని పేర్కొన్నారు. టీఆర్ఎస్‌ను కాంగ్రెస్ తీవ్రంగా అవమానించిందన్నారు. 2014 ఎన్నికల్లో టీఆర్ఎస్ ఒంటరిగా పోటీచేసి గెలిచినా, ఆ ఎన్నికల్లో తాను ఊహించిన సీట్లు గెలుచుకోలేకపోయామని వివరించారు.