నవంబర్ 19, 20 తేదీల్లో కేసీఆర్ ప్రచార హోరు

టీఆర్ఎస్ అధ్యక్షుడు, తెలంగాణ ఆపద్ధర్మ ముఖ్యమంత్రి కేసీఆర్ మలి విడత ఎన్నికల ప్రచార తేదీలను టీఆర్ఎస్ పార్టీ గురువారం ప్రకటించింది. ఈ నెల 19, 20న రెండు రోజుల పాటు కేసీఆర్ సుడిగాలి పర్యటనలతో పలు ఎన్నికల ప్రచారాల్లో పాల్గొనున్నారు. ఈ మేరకు ఎన్నికల ప్రచార షెడ్యూల్ ఖరారు చేశారు. మరోవైపు నామినేషన్లకు గడువు చివరిరోజైన 19న మూడు కీలక నియోజకవర్గాల్లో కేసీఆర్ ప్రచారం చేయనున్నారు.

నవంబర్ 19న వరుసగా ఖమ్మం, పాలేరు, పాలకుర్తిలో గులాబీ బాస్ కేసీఆర్ ప్రచార సభలలో పాల్గొని పార్టీ శ్రేణులలో పునరుత్సాహాన్ని నింపేందుకు సిద్ధమయ్యారు. ఆ మరుసటి రోజు (నవంబర్ 20న) ఉదయం సిద్దిపేట, దుబ్బాక నియోజకవర్గాల్లో పర్యటించి ప్రచారం చేస్తారు. అదేరోజు మధ్యాహ్నం కరీంనగర్ జిల్లాలో హుజూరాబాద్, సిరిసిల్ల జిల్లాలోని వేములవాడ నియోజకవర్గంలోని సభలో పాల్గొంటారు. చివరగా సాయంత్రం 5 గంటలకు కామారెడ్డి జిల్లాలోని ఎల్లారెడ్డి సభలో కేసీఆర్ పాల్గొనున్నట్లు టీఆర్ఎస్ ప్రతినిధులు తెలిపారు.

కాగా, సెప్టెంబర్ 6న అసెంబ్లీ రద్దు చేసిన కేసీఆర్, అంతకుముందే రంగారెడ్డి జిల్లా కొంగరకలాన్‌లో భారీ బహిరంగ సభ నిర్వహించారు. అదేరోజు 105 అసెంబ్లీ స్థానాలకు అభ్యర్థులను ప్రకటించిన కేసీఆర్ నిజామాబాద్, వనపర్తి, నల్గొండలో భారీ బహిరంగసభలు నిర్వహించిన విషయం తెలిసిందే.