నరకానికి నకలు.. సింగరేణి కాలనీ@ హైదరాబాద్

హైదరాబాద్‌లోని సింగరేణి కాలనీ అభివృద్ధికి ఆమడ దూరంలో ఉంది. ఇక్కడ ఐదు వేలకు పైగా గుడిసెల్లో జనం దుర్భర జీవితం గడుపుతున్నారు. పది వేలకుపైగా ఉన్న ఓటర్లు.. ఎన్నికలొస్తేనే నాయకులకు గుర్తొస్తున్నారు. గుడిసెల్లో ఉంటున్న వారికి పక్కా ఇళ్లు నిర్మించేందుకు గత ప్రభుత్వాల హయాంలో ఎప్పుడో ప్రయత్నాలు జరిగాయి. జీహెచ్ఎంసీ ఎన్నికల సమయంలో కాలనీ వాసులకు డబుల్ బెడ్రూం ఇళ్లు నిర్మించి ఇస్తామని టీఆర్ఎస్ హామీ ఇచ్చింది. ఈ ప్రాంత అభివృద్ధి తన బాధ్యత అని మంత్రి కేటీఆర్ ప్రకటించారు. కానీ ఏళ్లు గడిచినా సింగరేణి కాలనీ మురికి వాడగానే మిగిలిపోయింది. ఈ పరిస్థితి మారెదెన్నడని స్థానికులు ఆవేదన వ్యక్తం చేస్తున్నారు.

ఎటు చూసినా చెత్తాచెదారం దర్శనమిస్తుండగా.. కనీసం ఇక్కడ ఎలాంటి రోడ్డు సదుపాయం లేదు. ఇరుకు ఇళ్లలో.. ప్రజలు జీవితం వెళ్లదీస్తున్నారు. డ్రైనేజీ సదుపాయం లేకపోవడంతో మురుగు నీరు రోడ్ల మీదే ప్రవహిస్తోంది. చెత్తాచెదారం కారణంగా.. పందులు స్వైర విహారం చేస్తున్నాయి. అపరిశుభ్ర వాతావరణంలో పెరుగుతున్న పిల్లలను రోగాల బెడద వెంటాడుతోంది. ఇక్కడ నివసించే వారందరిదీ రెక్కాడితే గానీ డొక్క ఆడని పరిస్థితి.
గతంలో ఎప్పుడో.. ఇక్కడ సామూహిక మరుగుదొడ్లు నిర్మించారు. కానీ ఇప్పుడవి నిరూపయోగంగా మారాయి. దీంతో మహిళలు కూడా ఆరుబయటే కాలకృత్యాలు తీర్చుకోవాల్సిన దుస్థితి. ప్రభుత్వం తమను ఆదుకోవాలని, ఇళ్లు నిర్మించాలని స్థానికులు కోరుతున్నారు.