Nandamuri Suhasini: నందమూరి ఫ్యామిలీకి తెలంగాణ అచ్చిరాదా!

తెలంగాణ అసెంబ్లీకి ఇటీవల జరిగిన ఎన్నికల్లో నందమూరి వారి అమ్మాయిగా బరిలోకి దిగిన నందమూరి సుహాసిని ఓటమి పాలైన విషయం తెలిసిందే. అయితే దివంగత ముఖ్యమంత్రి, టీడీపీ వ్యవస్థాపకుడు నందమూరి ఎన్టీఆర్ నుంచి మొదలుకుని సుహాసిని వరకు గమనిస్తే ఆ ఫ్యామిలీకి మొత్తంగా ఇది నాలుగో ఓటమి. ప్రజాకూటమిగా ఏర్పడి కాంగ్రెస్, టీడీపీ, సీపీఐ, కోదండరామ్‌కు చెందిన టీజేఎస్ పోటీ చేశాయి. సీట్ల పంపకాలలో భాగంగా కూకట్‌పల్లి స్థానం టీడీపీకి లభించింది.

ఇటీవల రోడ్డు ప్రమాదానికి గురై చనిపోయిన, టీడీపీ నేత, నటుడు నందమూరి హరికృష్ణ కూతురు సుహాసినిని కూకట్‌పల్లి నుంచి బరిలో నిలిపారు పార్టీ అధ్యక్షుడు, ఏపీ సీఎం చంద్రబాబు నాయుడు. టీఆర్ఎస్ అభ్యర్థి మాధవరం కృష్ణారావు 41 వేల ఓట్ల మెజార్టీతో సుహాసినిపై విజయం సాధించారు. నందమూరి ఫ్యామిలీకి ఇది నాలుగో ఓటమి కాగా, తొలి ఓటమి ఎన్టీరామారావుది. 1989 అసెంబ్లీ ఎన్నికల్లో అనంతపురం జిల్లా హిందూపురం, మహబూబ్‌నగర్ జిల్లాలోని కల్వకుర్తి నుంచి ఎన్టీఆర్ పోటీ చేశారు.

హిందూపురంలో నెగ్గిన ఎన్టీఆర్ అనూహ్యంగా తెలంగాణలోని కల్వకుర్తిలో ఓటమి పాలయ్యారు. ఆ ఎన్నికల్లో టీడీపీ సైతం అధికారాన్ని సైతం కోల్పోయింది. దీంతో తెలంగాణ ప్రాంతంలో పోటీ తమకు నల్లేరుపై నడకకాదని ఎన్టీఆర్ గుర్తించారు. ఎన్టీఆర్ మరణం తర్వాత లక్ష్మీపార్వతి ‘ఎన్టీఆర్ తెలుగుదేశం’ పార్టీని స్థాపించగా.. ఆ పార్టీ టికెట్‌పై ఎన్టీఆర్ కుమారుడు జయకృష్ణ శ్రీకాకుళం నుంచి పోటీ చేసి ఓటమి పాలయ్యారు.

టీడీపీ నుంచి బయటకు వచ్చి హరికృష్ణ 1999లో ‘అన్న తెలుగుదేశం’ పార్టీని స్థాపించారు. కృష్ణాజిల్లా గుడివాడ నుంచి పోటీ చేసిన ఎన్టీఆర్ రథసారథి హరికృష్ణకు ఓటమి తప్పలేదు. తాజా హరికృష్ణ కూతురు సుహాసిని ఓటమిపాలు కావడంతో నందమూరి కుటుంబసభ్యుల ఓటమిపై చర్చ జరుగుతోంది. గతంలో పలు ఎన్నికల్లో నందమూరి కుటుంబసభ్యులు ఆంధ్రా ప్రాంతం (ఏపీ) నుంచి పోటీ చేసి విజయాలు సాధించారు. ఓటములు ఉన్నా చాలా తక్కువే. తెలంగాణలో మాత్రం వీరు పోటీ చేసిన ఏ సందర్భంలోనూ విజయం దక్కకపోవడం గమనార్హం. కాగా, తెలంగాణలో పోటీ చేస్తే ఎన్టీఆర్ ఫ్యామిలీకి అంతగా అచ్చిరాదని రాజకీయ విశ్లేషకులు చెబుతున్నారు.