Nandamuri Suhasini: నందమూరి సుహాసినికి టీడీపీ తొలి బీఫారం

మహాకూటమిలో సీట్ల సర్దుబాటు దాదాపు కొలిక్కి రావడంతో టీడీపీ తరఫున పోటీచేస్తున్న అభ్యర్థులకు ఆదివారం సాయంత్రం బీ-ఫారాలను అందజేశారు. అయితే తొలి బీ-ఫారాన్ని కూకట్‌పల్లి నుంచి పోటీ చేస్తున్న నందమూరి హరికృష్ణ కుమార్తె నందమూరి సుహాసినికి టీటీడీపీ నేతలు రావుల చంద్రశేఖర్ రెడ్డి, పెద్దిరెడ్డి అందజేశారు.

టీడీపీ టిక్కెట్ దక్కించుకున్న సామ రంగారెడ్డి మినహా ఇతర అభ్యర్థులు ఎన్టీఆర్ ట్రస్ట్ భవన్‌లో బీఫారాలు అందుకున్నారు. ఎన్నికల పర్యవేక్షణ కమిటీ కన్వీనర్‌గా రావుల వ్యవహరిస్తున్నారు. రాష్ట్ర ప్రధాన కార్యదర్శి జి.బుచ్చిలింగం కో-కన్వీనర్‌గా వ్యవహరిస్తారని ఎల్ రమణ ఇదివరకే వెల్లడించారు. ఆనవాయితీ ప్రకారం టీడీపీ అభ్యర్థుల చేత రావుల చంద్రశేఖర్‌ రెడ్డి పార్టీ ప్రమాణం చేయించారు. పార్టీ నిర్ణయాలకు కట్టుబడి ఉంటామని అభ్యర్థులు ప్రమాణం చేశారు.

బీఫారాలు అందుకున్న వారిలో నందమూరి సుహాసిని, సండ్ర వెంకట వీరయ్య, భవ్య ఆనందప్రసాద్‌, వీరేంద్ర గౌడ్‌, కూన వెంకటేశ్‌ గౌడ్‌, ముజఫర్‌ అలీ ఉన్నారు. కొత్తకోట దయాకర్‌రెడ్డి తరఫున ఆయన భార్య సీతా దయాకర్‌ రెడ్డి బి-ఫారం తీసుకున్నారు. కూటమిలో తమకు కేటాయించిన 14 స్థానాల్లో టీడీపీ ఇదివరకే 13 స్థానాలకు అభ్యర్థులను ప్రకటించిన విషయం తెలిసిందే. ఎన్నికల నామినేషన్లకు తుది గడువు నవంబర్ 19తో ముగియనుంది.

టీడీపీ అభ్యర్థులు...
ఖమ్మం - నామా నాగేశ్వరరావు
సత్తుపల్లి - సండ్ర వెంకట వీరయ్య
అశ్వరావుపేట - మచ్చా నాగేశ్వర్‌రావు
మహబూబ్‌నగర్ - ఎర్ర శేఖర్
మక్తల్ - కొత్తకోట దయాకర్ రెడ్డి
శేరిలింగంపల్లి - భవ్య ఆనంద ప్రసాద్
ఉప్పల్ - వీరేందర్ గౌడ్
మలక్‌పేట -ముజఫర్ అలీ
వరంగల్ పశ్చిమ - రేవూరి ప్రకాశ్‌రెడ్డి
రాజేంద్రనగర్ - గణేష్ గుప్తా
కూకట్‌పల్లి - నందమూరి సుహాసిని
ఇబ్రహీంపట్నం- సామ రంగారెడ్డి
సనత్‌నగర్- కూన శ్రీశైలంగౌడ్