స్వతంత్ర అభ్యర్థి చందర్: మూడో ప్రయత్నంలో విజయం.. గెలిపించిన సానుభూతి!

ఉమ్మడి కరీంనగర్ జిల్లాలో కారు ప్రభంజనం వీచినా రామగుండం నుంచి స్వతంత్ర అభ్యర్థి భారీ మెజార్టీతో విజయం సాధించారు. అధికార, ప్రతిపక్ష పార్టీల్లా కోట్లు కుమ్మరించలేకపోయినా విజయం మాత్రం అతడికే దక్కింది. ఫార్వర్డ్ బ్లాక్ నుంచి కోరుకుంటి చందర్ తన సమీప ప్రత్యర్థి టీఆర్ఎస్ అభ్యర్థి సోమారపు సత్యనారాయణపై భారీ మెజార్టీతో గెలుపొందారు. గతంలో రెండు సార్లు పోటీచేసి చందర్ ఓటమిపాలయ్యారు. 2009 ఎన్నికల్లో టీఆర్ఎస్ అభ్యర్థిగా, 2014 ఎన్నికల్లో స్వతంత్ర అభ్యర్థిగా పోటీచేసి ఓడిపోయారు. గత ఎన్నికల్లో కేవలం 2,200 ఓట్ల తేడాతో సోమారపు సత్యనారాయణ చేతిలో ఓటమి పాలయ్యారు. అయితే, ఎట్టకేలకు మూడో ప్రయత్నంలో ఫార్వర్డ్‌ బ్లాక్‌ అభ్యర్థిగా బరిలోకి దిగి విజయం అందుకున్నారు. గతంలో రెండుసార్లు ఓడిపోవడం, పోలింగ్‌కు కొద్ది రోజుల ముందే ఆయన భార్య కేన్సర్‌తో కన్నుమూయడంతో మరింత సానుభూతి వెల్లువెత్తింది.

ఈ సానుభూతి పవనాలనే అతడిని విజయ తీరాలకు చేర్చింది. తండ్రి సింగరేణి కార్మికుడైనా తెలంగాణ ఉద్యమ సమయంలో క్రీయాశీలకంగా వ్యవహరించి అనేక కేసుల్లో చిక్కుకున్నారు. ఈసారి చందర్‌ వాటినే తన ప్రచారాస్త్రాలుగా చేసుకున్నారు. ప్రజా అంకిత యాత్ర పేరుతో నియోజకవర్గంలోని ప్రతి ఇంటికి వెళ్లి మద్దతు కోరారు. అప్పటికే ఆయన భార్య కేన్సర్‌తో బాధపడటం, పోలింగ్‌కు కొద్ది రోజుల ముందు ఆమె మృతి చెందడంతో ప్రచారాన్ని అనుచరులే ముందుండి నడిపించారు. దీంతో ఆయనపై మరింత సానుభూతి వ్యక్తమైంది. టీఆర్‌ఎస్‌లోని పలువురు నాయకులు కూడా చందర్‌ పక్షాన నిలిచి మద్దతుగా ప్రచారం చేశారు. సోమారపు సత్యనారాయణ ముఖ్య అనుచరుల్లో కొందరు ఆయన వెంట నడిచారు. ఇవన్నీ ఫలించడంతో చందర్‌ 26 వేల ఓట్ల మెజారిటీతో విజయం సొంతం చేసుకున్నారు.