ఉద్యమ పుట్టినిల్లులో గులాబీ జెండా ఎగరేద్దాం: హరీష్‌రావు

తెలంగాణ సాధన ఉద్యమానికి దుబ్బాక, సిద్ధిపేట ప్రాంతాలు పుట్టినిల్లు వంటివని టీఆర్ఎస్ నేత, ఆపద్ధర్మ మంత్రి హరీష్ రావు వ్యాఖ్యానించారు. రేపు (నవంబర్ 20న) సిద్ధిపేటలో టీఆర్ఎస్ అధ్యక్షుడు, ఆపద్ధర్మ ముఖ్యమంత్రి కేసీఆర్ నిర్వహించనున్న సభ ఏర్పాట్లను హరీష్ సోమవారం పరిశీలించారు. సిద్దిపేట జిల్లా కేంద్రంలోని పత్తి మార్కెట్ యార్డు వద్ద హరీష్ మీడియాతో మాట్లాడారు. సిద్దిపేట, దుబ్బాక నియోజకవర్గాలకు సంబంధించి టీఆర్ఎస్ ఎన్నికల ప్రచారంలో భాగంగా కేసీఆర్ ఇక్కడికి వస్తున్నారని తెలిపారు.

మంగళవారం మధ్యాహ్నం 12 గంటలకు కేసీఆర్ సభ ప్రారంభమవుతుందన్నారు. అసలే సిద్దిపేట, దుబ్బాక ప్రాంతాలు తెలంగాణ ఉద్యమానికి రెండు పుట్టినిల్లులు వంటివని వ్యాఖ్యానించారు. కేసీఆర్ సభకు ఆయన అభిమానులు, టీఆర్ఎస్ శ్రేణులు, తెలంగాణ ఉద్యమకారులు, టీఆర్ఎస్ ప్రభుత్వ పథకాల లబ్దిదారులు భారీ సంఖ్యలో తరలి రావాలని హరీష్ పిలుపునిచ్చారు. ఎన్నికల కోడ్ అమల్లో ఉందని, భారీగా వాహనాలను సమకూర్చడం సాధ్యం కాదన్నారు.

కేసీఆర్ సిద్దిపేట నియోజకవర్గానికి ఎన్నో వరాలు ఇచ్చారని, ప్రతిష్టాత్మక కాళేశ్వరం ప్రాజెక్టు పనులు, రైల్వేలైన్ పనులు చురుకుగా సాగుతున్నాయని వెల్లడించారు. మరోసారి టీఆర్ఎస్‌కు అధికారం అందించి ఆశీర్వదించాలని కోరారు. టీఆర్ఎస్ శ్రేణులు పార్టీ విజయం కోసం కృషి చేయాలని పిలుపునిచ్చారు.