Revanth Reddy: రేవంత్‌ రెడ్డి విడుదల.. కొడంగల్ తరలింపు

హైకోర్టు మొట్టికాయలతో పోలీసులు దిగొచ్చారు. తెలంగాణ కాంగ్రెస్ కార్యనిర్వాహక అధ్యక్షుడు, కొడంగల్ అభ్యర్థి రేవంత్ రెడ్డిని ఎట్టకేలకు విడుదల చేశారు. జడ్చర్ల జిల్లా పోలీస్ ట్రైనింగ్ సెంటర్ నుంచి ఆయణ్ని తరలించారు. భారీ పోలీసు భద్రత మధ్య రేవంత్‌ను కొడంగల్‌కు తరలించారు. రాష్ట్ర ఎన్నికల ప్రధాన అధికారి ఆదేశాల మేరకు రేవంత్‌ను విడుదల చేయాలని డీజీపీ మహేందర్ రెడ్డి పోలీసులకు సూచించారు. దీంతో అధికారులు ఆయణ్ని విడుదల చేశారు.

కాంగ్రెస్ స్టార్ పార్టీ స్టార్ క్యాంపెయినర్ అయిన రేవంత్ రెడ్డి రాష్ట్రంలో ఎక్కడైనా ప్రచారం చేసుకోవచ్చని సీఈవో రజత్‌ కుమార్‌ పేర్కొన్నారు. రేవంత్‌ను వెంటనే విడుదల చేయాలని తెలంగాణ డీజీపీకి ఆదేశాలు జారీ చేశారు. డీజీపీ ఆదేశాల మేరకు పోలీసులు రేవంత్‌ను విడుదల చేసి కొడంగల్ తరలించారు.

రేవంత్ అరెస్టు విషయంలో దాఖలైన లంచ్ మోషన్ పిటిషన్‌పై విచారణ చేపట్టిన హైకోర్టు పోలీసుల వ్యవహార శైలిపై ఆగ్రహం వ్యక్తం చేసిన విషయం తెలిసిందే. ఏ ఆధారాలతో రేవంత్‌ను అరెస్టు చేశారని పోలీసులను ఉన్నత న్యాయస్థానం ప్రశ్నించింది. నియోజకవర్గంలో అల్లర్లు చెలరేగే ప్రమాదముందన్న ఇంటలిజెన్స్‌ నివేదికల మేరకు ఆయణ్ని ముందస్తుగా అదుపులోకి తీసుకున్నామని పోలీసులు సమాధానమివ్వగా.. ఆధారాలు సమర్పించాలని కోర్టు ఆదేశించింది.

రేవంత్‌ను అక్రమంగా అరెస్ట్‌ చేశారంటూ వేం నరేందర్ రెడ్డి హైకోర్టులో హెబియస్‌ కార్పస్‌ పిటిషన్‌ను దాఖలు చేశారు. తన పిటిషన్‌ను అత్యవసరంగా విచారించాలంటూ కోరారు. పిటిషన్‌ను విచారణకు స్వీకరించిన ఉన్నత న్యాయస్థానం.. పోలీసుల తీరుపై ఆగ్రహం వ్యక్తం చేసింది..

Also Read: రేవంత్‌ తప్పేంటి.. హైకోర్టు మండిపాటు