ఓట్ల లెక్కింపు: శేరిలింగంపల్లిలో అత్యధికంగా 42 రౌండ్లు, తొలి ఫలితం ఎక్కడంటే?

తెలంగాణతో సహా ఐదు రాష్ట్రాల శాసనసభ ఎన్నిలక ఫలితాలు మంగళవారం వెల్లడికానున్నాయి. నరాలు తెగే ఉత్కంఠకు నేటితో తెరపడనుంది. వచ్చే సాధారణ ఎన్నికలకు సెమీ ఫైనల్స్‌గా భావిస్తోన్న ఈ ఎన్నికలు అన్ని పార్టీలకూ కీలకమే. ఇక తెలంగాణలో మొత్తం 119 శాసనసభ స్థానాలకు శుక్రవారం జరిగిన ఎన్నికల్లో స్వతంత్రులతో కలిపి మొత్తం 1,821 అభ్యర్థులు బరిలో ఉన్నారు. మొత్తం 2.81 కోట్ల మంది ఓటర్లలో 73.2 శాతం మంది ఓటు హక్కును వినియోగించుకున్నారు. రాష్ట్ర వ్యాప్తంగా 43 కేంద్రాల్లో ఓట్ల లెక్కింపు జరగనుంది. అత్యధికంగా హైదరాబాద్‌‌లో 13 ప్రాంతాల్లో, మిగతా 30 జిల్లాల్లోని ఒక్కో లెక్కింపు కేంద్రం చొప్పున ఏర్పాటు చేశారు. ఉదయం 8 గంటలకు ఆయా పార్టీల ఏజెంట్ల సమక్షంలో అధికారులు స్ట్రాంగ్‌ రూమ్‌ల నుంచి ఈవీఎంలను బయటకు తీసుకువస్తారు. ఓట్ల లెక్కింపులో భాగంగా తొలుత అన్ని నియోజకవర్గాల్లో పోస్టల్‌ బ్యాలెట్లను లెక్కించనున్నారు. 44,258 మందికి పోస్టల్‌ బ్యాలెట్లు ఇచ్చినట్లు రాష్ట్ర ముఖ్య ఎన్నికల అధికారి రజత్‌కుమార్‌ వెల్లడించారు.

కాగా, ఓట్ల లెక్కింపు కేంద్రాల్లో ఒక్కో నియోజకవర్గానికి 14 టేబుళ్లను ఏర్పాటు చేశారు. ఒక్కో రౌండ్‌లో 14 టేబుళ్ల మీద 14000 ఓట్లు చొప్పున లెక్కిస్తారు. అత్యధికంగా శేరిలింగంపల్లిలో 42, అత్యల్పంగా భద్రాచలం, అశ్వారావుపేటలలో 12 రౌండ్లలో లెక్కింపు పూర్తవుతుందని సీఈఓ రజత్‌కుమార్‌ తెలిపారు. తొలి ఫలితం భద్రచలం నియోజకవర్గానిదే వెల్లడవుతుంది. ఓట్ల లెక్కింపు సమయంలో ప్రతి నియోజకవర్గం నుంచి ఏదైనా ఒక పోలింగ్‌ కేంద్రం వీవీప్యాట్‌లోని స్లిప్పులనూ లెక్కించి అక్కడ ఈవీఎంలో నమోదైన ఓట్లతో సరిపోలుస్తారు. అయితే, అతి తక్కువ ఆధిక్యత వచ్చిన నియోజకవర్గాల్లో మాత్రమే, అదీ అవసరం అనుకుంటేనే అన్ని వీవీప్యాట్‌‌ల్లోని స్లిప్‌లు లెక్కిస్తారు. ఓట్ల లెక్కింపులో పాల్గొనే సుమారు 15వేల సిబ్బందికి ఎన్నికల సంఘం ఆదివారం శిక్షణను పూర్తి చేసింది. భద్రత కోసం 20వేల మంది పోలీసులు, కౌంటింగ్‌ అధికారులు, సహాయ సిబ్బంది సహా మొత్తం 40వేల మంది ఓట్ల లెక్కింపు విధుల్లో పాల్గొంటున్నారు.