TRS: టీఆర్ఎస్ అభ్యర్థి విద్యార్హత: 2014 ఎన్నికల్లో గ్రాడ్యుయేషన్, ఇప్పుడు ఇంటర్!

గత ఎన్నికల్లో తాను అమెరికాలోని ఓ యూనివర్సిటీ నుంచి డిగ్రీ పూర్తిచేసినట్టు నామినేషన్ అఫిడ్‌విట్‌లో పేర్కొన్న అభ్యర్థి, ప్రస్తుతం మాత్రం ఇంటర్ మాత్రమే చదివానంటూ పేర్కొన్నాడు. దీంతో ఆయన విద్యార్హతలపై ఇప్పుడు చర్చకు దారితీసింది. మల్కాజ్‌గిరి టీఆర్ఎస్ అభ్యర్థిగా బరిలోకి దిగిన మైనంపల్లి హన్మంతరావు తాజా అఫిడ్‌విట్‌లో తాను ఇంటర్మీడియట్ చదవినట్టు విద్యార్హతల కాలమ్‌లో తెలిపారు. అయితే, 2009, 2014 ఎన్నికల్లో మాత్రం తాను అలబామా యూనివర్సిటీ నుంచి 1992లో డిగ్రీ పొందినట్టు తెలియజేశారు. 2009లో మెదక్ శాసనసభకు, 2014లో మల్కాజ్‌గిరి పార్లమెంటు స్థానానికి పోటీచేసిన మైనంపల్లి ఓటమి చవిచూశారు. తాను అలబామా యూనివర్సిటీ నుంచి బిజినెస్ అడ్మినిస్ట్రేషన్‌లో గ్రాడ్యుయేషన్ పూర్తిచేశానని అప్పట్లో వెల్లడించారు. తాజా అఫిడ్‌విట్‌లో మాత్రం విద్యార్హతల కాలమ్‌లో ఇంటర్‌గా పేర్కొనడం విశేషం.

గతంలో ఆయన దాఖలుచేసిన నామినేషన్ పత్రాలు ఎన్నికల కమిషన్ వెబ్‌సైట్‌లో దర్శనమివ్వడంతో ఈ విషయం వెలుగులోకి వచ్చింది. ఆయన ఎందుకు తన విద్యార్హతలను తగ్గించారని పలువురు సందేహాలు వ్యక్తం చేస్తున్నారు. అయితే, దీనిపై మైనంపల్లి వివరణ కోరేందుకు మీడియా ప్రయత్నించగా ఆయన అందుబాటులోకి రాలేదు. ఇదే నిజయోకవర్గం నుంచి బీజేపీ నుంచి రామచంద్రరావు, మహాకూటమి తరఫున టీజేఎస్ నేత దిలీప్ కుమార్ పోటీ చేస్తున్నారు. గతంలో మైనంపల్లి, రామచంద్రరావులు ఎమ్మెల్సీలుగా పనిచేశారు. తన విద్యార్హతలపై మైనంపల్లి ఎలా స్పందిస్తారో మరి. దీన్ని ప్రత్యర్థులు తమకు అనుకూలంగా వాడుకునే అవకాశం కూడా ఉంది. ఎన్నికల్లో ఏ ఒక్క అవకాశం లభించినా వదులుకోడానికి రాజకీయ పార్టీలు సిద్ధంగా ఉండవు. ప్రత్యర్థి బలహీనతలనే దెబ్బకొట్టడానికి ప్రయత్నిస్తాయి.