KCR: 2న పరేడ్ గ్రౌండ్‌లో కేసీఆర్ బహిరంగ సభ

తెలంగాణ ముందస్తు ఎన్నికల ప్రచారం క్లైమాక్స్‌కు చేరుకుంది. ఆపద్ధర్మ ముఖ్యమంత్రి, టీఆర్‌ఎస్‌ అధ్యక్షుడు కేసీఆర్‌ గత కొన్ని రోజులుగా సుడిగాలి పర్యటనలు చేసి గులాబీ శ్రేణులలో నూతనోత్సాహాన్ని తెచ్చారు. నగరంలో గత కొన్ని రోజులుగా ఆపద్ధర్మ మంత్రి కేటీఆర్‌ చేసిన రోడ్‌షోలకు విశేష స్పందన వచ్చింది. ఈసారి హైదరాబాద్‌లోనూ పలుచోట్ల గులాబీ ఎగరనుందని ఆయన ధీమా వ్యక్తం చేస్తున్నారు. ఈ క్రమంలోనే ఈ నెల 2వ తేదీన (ఆదివారం) హైదరాబాద్‌లోని పరేడ్ గ్రౌండ్ వేదికగా టీఆర్‌ఎస్‌ భారీ బహిరంగసభ నిర్వహిచనుంది.

టీఆర్‌ఎస్‌ అధినేత పాల్గొనే భారీ బహిరంగ సభకు పార్టీ కార్యకర్తలు, అభిమానులు మద్దతుదారులు సమాయత్తం అవుతున్నారు. నగరంలోని ఒక్కో నియోజకవర్గం నుంచి వేల సంఖ్యలో టీఆర్‌ఎస్‌ కార్యకర్తలు సభకు తరలిరానున్నారు. ఓల్డ్‌ సిటీ నుంచి కూడా టీఆర్‌ఎస్‌ శ్రేణులు భారీగానే సభకు హాజరై కేసీఆర్‌కు తమ మద్దతు తెలపనున్నాయని సమాచారం. వీరితో పాటు గ్రేటర్ హైదరాబాద్‌ పరిధిలోని అన్ని నియోజకవర్గాల నుంచి 4 లక్షలకు పైగా మంది పరేడ్ గ్రౌండ్స్‌కు వచ్చే అవకాశాలున్నాయని పార్టీ నేతలు చెబుతున్నారు.

గ్రేటర్‌ ప్రచార బాధ్యతలు స్వీకరించిన కేటీఆర్‌ రోడ్‌ షోలతో నగరంలో ప్రచారాన్ని హోరెత్తించారు. ఉప్పల్, కంటోన్మెంట్, మహేశ్వరం, ఎల్బీనగర్, సనత్‌నగర్, జూబ్లీహిల్స్, ఖైరతాబాద్, గోషామహల్, కూకట్‌పల్లి, కుత్బుల్లాపూర్లలో కేటీఆర్ రోడ్‌షోకు విశేష స్పందన వచ్చింది. కేటీఆర్‌ రోడ్‌ షోలు సక్సెస్‌ కావడంతో ఈ ఎన్నికల్లో హైదరాబాద్‌లో గులాబీ జెండా ఎగురుతుందని టీఆర్‌ఎస్‌ నేతలు ధీమా వ్యక్తం చేస్తున్నారు.

ఆయా నియోజకవర్గాల్లో ప్రజా కూటమి అభ్యర్థుల కదలికలకు అనుగుణంగా వ్యూహాలకు పదును పెడుతున్న టీఆర్‌ఎస్‌ తమ అధినేత కేసీఆర్‌తో భారీ బహిరంగ సభ నిర్వహించి గ్రేటర్‌లో తమ బలమెంతో చూపించాలని ఉవ్విళ్లూరుతోంది. సంక్షేమ పథకాలను ప్రజల్లోకి బలంగా తీసుకెళ్లడానికి కేసీఆర్‌తో సభ నిర్వహించడమే ఉత్తమమని భావించి పరేడ్ గ్రౌండ్ సభ నిర్వహిస్తున్నారు.