Jupally Krishna Rao: మంత్రి జూపల్లి కృష్ణారావు ఓటమి!

తెలంగాణ ఎన్నికల్లో కారు పార్టీ అఖండ విజయం దిశగా సాగుతోంది. ఇప్పటి వరకు వచ్చిన ఫలితాల ప్రకారం.. టీఆర్ఎస్ ఇప్పటికే ఏడు చోట్ల గెలుపొంది, 80 స్థానాల్లో ఆధిక్యత ప్రదర్శిస్తోంది. తెలంగాణ అంతటా గులాబీ ప్రభంజనం వీచినా కొందరు మంత్రులు ఓటమి పాలయ్యారు. ఖమ్మం జిల్లా పాలేరు నియోజకవర్గంలో తుమ్మల నాగేశ్వరరావు, కొల్లాపూర్‌లో జూపల్లి కృష్ణారావు కాంగ్రెస్ అభ్యర్థుల చేతిలో ఓడిపోయారు. అన్ని చోట్లా కేసీఆర్ చరిష్మా పనిచేసినా ఈ సీట్లలో మాత్రం మంత్రులను గట్టెక్కించలేకపోయింది. కాంగ్రెస్‌కు చెందిన సమీప ప్రత్యర్థి కందాళ ఉపేందర్‌రెడ్డి చేతిలో కేవలం 1,950 ఓట్ల తేడాతో తుమ్మల పరాజయం చవిచూశారు. నాగర్‌కర్నూలు జిల్లాలోని కొల్లాపూర్‌ నుంచి బరిలో నిలిచిన తెరాస అభ్యర్థి, మంత్రి జూపల్లి కృష్ణారావు.. కాంగ్రెస్‌కు చెందిన బీరం హర్షవర్థన్‌రెడ్డి చేతిలో 7 వేలకు పైగా ఓట్లతో ఓటమి పాలయ్యారు.

ఓటమిపై మంత్రి జూపల్లి మాట్లాడుతూ.. తన ఓటమికి కారణం టీఆర్ఎస్ నేతలేనని, ఈ ఎన్నికల్లో సొంతపార్టీ నేతలే తనకు వ్యతిరేకంగా ఓట్లు వేయించారని.. అందుకే ఓడిపోయానని పేర్కొన్నారు. ఎన్నికల్లో ఓడిపోయినందుకు బాధగా లేదని.. ఐదేళ్లు రెస్ట్‌ తీసుకుంటానని అన్నారు. ఐదుసార్లు తనను ఆశీర్వదించిన కొల్లాపూర్ ప్రజలకు ధన్యవాదాలు తెలిపారు. కొల్లాపుర్‌కు సంబంధించి అభివృద్ధి, సంక్షేమ పథకాలు అమలైనప్పటికీ.. టీఆర్‌ఎస్‌ నేతలే విచ్చలవిడిగా డబ్బులు పంచి తనకు వ్యతిరేకంగా ఓట్లు వేయించారని జూపల్లి ఆరోపించారు. కేసీఆర్‌ అమలు చేసిన సంక్షేమ పథకాలే ఎన్నికల్లో విజయానికి కారణమని వ్యాఖ్యానించారు.