Sonia Gandhi: సోనియా నోట బాబు మాటలు.. తెలంగాణలో ఆంధ్ర సంగతెందుకు: కవిత

మేడ్చల్ సభలో సోనియా గాంధీ తెలంగాణ హక్కుల గురించి మాట్లాడకపోవడం దారుణమన్నారు నిజామాబాద్ ఎంపీ కవిత. ఎప్పటికైనా తెలంగాణ ఆత్మగౌరవం కోసం పోరాడేది ఒక్క టీఆర్ఎస్ మాత్రమేనన్నారు. జగిత్యాలలో పర్యటిస్తున్న కవిత.. మీడియాతో మాట్లాడారు. మేడ్చల్ కాంగ్రెస్ బహిరంగ సభలో సోనియా గాంధీ చేసిన విమర్శలకు కౌంటర్ ఇచ్చారు.

మేడ్చల్ వచ్చిన సోనియా గాంధీ తెలంగాణ గురించి కాకుండా.. పక్క రాష్ట్రానికి ప్రత్యేక హోదా ఇస్తామనడం ఏంటని ప్రశ్నించారు కవిత. సోనియా మాటలు చూస్తుంటే.. చంద్రబాబు మాటలుగా ఉన్నాయని వ్యాఖ్యానించారు. ఆంధ్రప్రదేశ్ ఎజెండాను తెలంగాణలో తేవాలని కుట్ర చేస్తున్నారని విమర్శించారు. సోనియాలా ఢిల్లీలో ఓ మాట.. తెలంగాణలో మరో మాట్లాడమన్నారు. టీఆర్ఎస్ ఎక్కడైనా తెలంగాణ హక్కుల కోసం పోరాడుతుందన్నారు.

తెలంగాణ వచ్చి.. ఆంధ్రాకు హామీలు ఇవ్వడమంటే ఇక్కడి ప్రజల్ని అవమానించడమే అన్నారు కవిత. మేడ్చల్ సభలో సోనియా వ్యాఖ్యలతో ప్రజా కూటమి పయనం ఎటువైపు తెలిసిపోయిందన్నారు. లోక్‌సభలో విభజన హామీలపై టీఆర్ఎస్ ఎంపీలు పోరాటం చేస్తే.. ముందు వరుసలో కూర్చున్న సోనియా కనీసం మాట్లాడలేదన్నారు. తెలంగాణ ప్రయోజనాల గురించి మాట్లాడని వాళ్లకు ఎన్నికల్లో ఓట్లెందుకు వేయాలని ప్రజలు ఆలోచిస్తున్నారని అభిప్రాయపడ్డారు. తెలంగాణ పట్ల కాంగ్రెస్‌ది ఎప్పటికీ చిన్నచూపేనని వ్యాఖ్యానించారు.

ఈ నెల 26న జగిత్యాలలో జరిగే సీఎం కేసీఆర్ సభను విజయవంతం చేయాలని పిలుపునిచ్చారు కవిత. జగిత్యాల జిల్లాను ఎవరూ అడగకుండా ఏర్పాటు చేశామన్నారు. స్థానిక ఎమ్మెల్యే జీవన్‌రెడ్డి కేసీఆర్‌పై విమర్శలు తప్ప నియోజకవర్గ ప్రజలకు చేసింది ఏమీ లేదన్నారు. జిల్లా అభివృద్ధికి ఎంపీగా కృషిచేశా. ప్రతిపక్ష నేతలు నేతలు అడ్డుకున్నా జగిత్యాలలో అభివృద్ధి చేశామన్నారు.