TDP Candidates List: టీడీపీ రెండో జాబితా విడుదల.. వీడని సస్పెన్స్

తెలంగాణ అసెంబ్లీ ఎన్నికల్లో మహాకూటమిగా ఏర్పడ్డ టీడీపీ తమ అభ్యర్థుల రెండో జాబితాను బుధవారం రాత్రి విడుదల చేసింది. మహాకూటమిలో భాగంగా టీడీపీకి 14 సీట్లు కేటాయించిన సంగతి తెలిసిందే. ఇందులో 9 స్థానాలకు అభ్యర్థులను ప్రకటించగా, తాజాగా మరో రెండు స్థానాలకు అభ్యర్థులను ఖరారు చేసింది. ఇబ్రహీంపట్నం నుంచి సామ రంగారెడ్డిని, రాజేంద్ర నగర్ నుంచి గణేష్ గుప్తాను బరిలోకి దింపుతున్నట్లు టీడీపీ అధిష్టానం ప్రకటించింది. దీంతో టీడీపీ మరో మూడు స్థానాలను పెండింగ్‌లో ఉంచినట్లయింది.

టీడీపీ రెండో జాబితా అభ్యర్థులు వీరే..
ఇబ్రహీంపట్నం - సామ రంగారెడ్డి
రాజేంద్రనగర్ - గణేష్ గుప్తా

సీట్లు ఆశిస్తున్న మరికొందరు టీడీపీ నేతలు ఇంకా డైలమాలోనే ఉన్నారు. మిగిలిన స్థానాల్లోనైనా తమకు అవకాశం రాకపోతుందా అని ఆశావహదృక్పథాన్ని కొనసాగిస్తున్నారు. తొలి జాబితాలో సీనియర్లకే ప్రాధాన్యం ఇచ్చిన టీడీపీ, రెండో జాబితాలోనే మిగతా ఐదుగురు అభ్యర్థుల పేర్లు ప్రకటిస్తుందని అంతా భావించారు. కానీ కాంగ్రెస్ తరహాలోనే ఆచితూచి వ్యవహరిస్తున్న టీడీపీ ఎల్బీనగర్ సిట్టింగ్ స్థానాన్ని వదులుకున్న విషయం తెలిసిందే. అయితే సామ రంగారెడ్డి ఎల్బీనగర్ నియోజకవర్గం నుంచి బరిలోకి దిగాలని భావించినట్లు సమాచారం. అందులో భాగంగా సామరంగారెడ్డి ఎల్బీనగర్‌లో ప్రచారం మొదలుపెట్టారని తెలుస్తోంది. అనూహ్యంగా ఆయనకు పార్టీ ఇబ్రహీంపట్నం సీటు కేటాయించింది.

టీడీపీ తొలి జాబితాలో చోటు దక్కిన అభ్యర్థులు వీరే:
ఖమ్మం- నామా నాగేశ్వర రావు
సత్తుపల్లి- సండ్ర వెంకట వీరయ్య
అశ్వారావు పేట- మచ్చ నాగేశ్వర రావు
వరంగల్‌ పశ్చిమ- రేవూరి ప్రకాశ్‌ రెడ్డి
మక్తల్‌- కొత్తకోట దయాకర్‌ రెడ్డి
మహబూబ్‌ నగర్‌- ఎర్ర శేఖర్‌
ఉప్పల్‌- వీరేందర్‌ గౌడ్‌
శేరిలింగంపల్లి- భవ్య ఆనంద్‌ ప్రసాద్‌
మలక్‌‌పేట- ముజఫర్‌ అలీ