యువతపై వరాల జల్లు.. ఐటీ రంగంలో 22 లక్షల ఉద్యోగాలు : అఖిలేష్ యాదవ్

యూపీ ఎన్నికల ప్రచారం ఊపందుకుంది. రాష్ట్రంలో బీజేపీ పార్టీ ఇంటింటికి వెళ్లి ప్రచారం చేస్తుంది. తమకే ఓట్లు వేయమని ప్రజలను అడుగుతోంది. మిగతా పార్టీలు కూడా ఓటర్లను తమవైపు తిప్పుకునేందుకు ప్రయత్నాలు మొదలుపెట్టాయి. అధికారాన్ని కైవసం చేసుకునేందుకు ప్రజలపై వరాలు జల్లు కురిపిస్తున్నాయి. ఇందులో భాగంగా సమాజ్‌వాదీ పార్టీ అధినేత అఖిలేష్ యాదవ్ కీలక ప్రకటన చేశారు. యువతను ఆకట్టుకునే విధంగా ఓ హామీని ఇచ్చారు. తమ పార్టీ అధికారంలోకి వస్తే ఐటీ రంగంలో 22 లక్షల ఉద్యోగాలు కల్పిస్తామని చెప్పారు. అఖిలేష్ యాదవ్ శుక్రవారం ప్రెస్‌ మీట్‌లో ఈ విషయం వెల్లడించారు. ఈ సందర్భంగా ఐటీ రంగంలో రాష్ట్రం మరింత ముందుకు వెళ్లేందుకు సమాజ్ వాదీ ప్రభుత్వం కృషి చేసిందని, చక్ గజారియా ఫామ్ కోసం హెచ్సీఎల్ తొలుత ఇక్కడే పెట్టుబడి పెట్టిందని ఆయన అన్నారు. ఎస్పీ ప్రభుత్వ హయాంలో చేసిన పనులను ముందుకు తీసుకెళ్లి ఉంటే లక్నో ఐటీ హబ్గా గుర్తింపు పొంది ఉండేదని అన్నారు.

కాగా ఈ సమావేశంలో కాంగ్రెస్ మాజీ ఎంపీ ప్రవీణ్ సింగ్ అరోన్, ఆయన భార్య సుప్రియా అఖిలేశ్ సమయంలో సమాజ్‌ వాదీ పార్టీలో చేరారు. కాంగ్రెస్ పార్టీ బరేలీ కంటోన్మెంట్ స్థానాన్ని సుప్రియాకు కేటాయించింది. కానీ ఆమె పార్టీ మారడం ప్రాధాన్యతను సంతరించుకుంది. మరోవైపు మెయిన్‌పురీలోని కర్హాల్ నియోజకవర్గం నుంచి అఖిలేశ్ యాదవ్ పోటీ చేస్తున్నారు. ఆ నియోజకవర్గంలో లక్షా 44 వేల మంది యాదవ వర్గం ఓట్లు ఉన్నాయి. అఖిలేష్ ప్రస్తుతం అజాంగఢ్ లోక్‌సభకు ప్రాతినిథ్యం వహిస్తున్నారు. ఇక ఉత్తర్ ప్రదేశ్ ఎన్నికలు ఏడు దశల్లో ఫిబ్రవరి 10 నుంచి మార్చ్ 7 వరకు జరుగుతాయి. మార్చి 10న ఎన్నికల కౌంటింగ్ ఉంటుంది.