మోదీ వర్సెస్ మమతా.. మధ్యలో అసద్.! ఆడిస్తోంది బీజేపీనే..

పశ్చిమ బెంగాల్ అసెంబ్లీ ఎన్నికల వేళ మాటల యుద్ధం ముదురుతోంది. ఇప్పటికే రాష్ట్రంలో రెండు దశల పోలింగ్ పూర్తయింది. ఈ నెల 6వ తేదీన మూడో దశ పోలింగ్ జరగనుంది. ఎలాగైనా ఈసారి బెంగాల్‌లో జెండా ఎగరేయాలని చూస్తున్న బీజేపీకి ధీటుగా బదులిస్తున్నారు తృణమూల్ కాంగ్రెస్ అధినేత్రి, సీఎం మమతా బెనర్జీ. బీజేపీ కుటిల రాజకీయాలకు పాల్పడుతోందని తీవ్రంగా విరుచుకుపడుతున్నారు.

హిందూ, ముస్లింలు కలసి మెలసి దుర్గామాతకి పూజలు చేయడం మన సంస్కృతి అని దీదీ అన్నారు. కానీ బీజేపీ హిందూ, ముస్లిం విభజన రాజకీయాలకు తెరతీసిందని ఆమె ఆరోపించారు. అందులో భాగంగానే ఏఐఎంఐఎం, ఐఎస్‌ఎఫ్ పార్టీలను వాడుకుంటోందని ఆమె అన్నారు. హిందూ, ముస్లింలను విభజించడానికి ఆ పార్టీలకు బీజేపీ డబ్బులిచ్చిందంటూ సంచలన ఆరోపణలు చేశారు. మజ్లిస్, ఐఎస్‌ఎఫ్ పార్టీలకి ఓటేస్తే బీజేపీకి వేసినట్లేనని ఆమె చెప్పారు. బీజేపీ నేతలు బెంగాల్‌ను నాశనం చేస్తున్నారని మమతా మండిపడ్డారు. బయటి నుంచి వచ్చిన బీజేపీ గూండాలకు ఓటు వేయొద్దని ఆమె పిలుపునిచ్చారు.

పశ్చిమ బెంగాల్‌లో పర్యటించిన ప్రధాని మోదీ అదేరీతితో మమతా బెనర్జీ ప్రభుత్వంపై విమర్శలు చేశారు. రెండో దశ పోలింగ్‌ జరిగిన నందిగ్రామ్‌లో మమతా ఓడిపోతారని ఆమె ప్రవర్తన చూస్తే అర్థమవుతోందని.. అందుకే మరో నియోజకవర్గంలో పోటీ చేసేందుకు ఆమె సిద్ధమవుతున్నారని పుకార్లు వస్తున్నాయని మోదీ అన్నారు. దీదీ.. ఓ దీదీ అది నిజమేనా అంటూ ఎద్దేవా చేశారు. ముఖ్యమంత్రిని ఉద్దేశించి ప్రధాని చేసిన వ్యాఖ్యలు పశ్చిమ బెంగాల్‌లో తీవ్ర దుమారం రేపాయి.

Also Read: